Featured
    KWA HABARI NA MATANGAZO EMAIL : pbuyegu2@gmail.com ... Get a superior results by advertising with us by E- Mail us pbuyegu2@gmail.com We will bring Your Business to Light

    Featured Posts

Loading...

RAIS MAGUFULI KAAMUA KUTOKA ANGANI, DARAJANI, ARDHINI HADI MAJINI

JPM  Kaamua....Kutoka Angani, Darajani Hadi Mtoni. Pata Nakala Yako Bure Kuona Nini Serikali Yako Imefanya

==>>Jarida Zima la NCHI YETU liko hapo chini. Waweza soma hapo chini au ukiamua lipakue uwe nalo na lisambaze kwa wengine.

<<<BOFYA HAPA KULI DOWNLOAD>>

Au Lisome Jarida  hapo chiniπŸ‘‡πŸ‘‡πŸ‘‡

 

MUONEKANO MPYA WA SASA ULIVYO DARAJA LA TAZARA


Daraja la juu llinalojengwa na serikali katika eneo la  TAZARA  jijini Dar es salaam likiwa katika hatua za Mwisho za ujenzi wake. (Picha na Ofisi ya Waziri Mkuu)

NEC yaipiga Barua Chadema

Tume ya Taifa ya Uchaguzi (NEC) imeiandikia barua Chadema ikitaka utambulisho wa mawakala watakaosimamia uchaguzi wa marudio wa jimbo la Buyungu na Kata 77 Agosti 12, 2018.

Akizungumza na waandishi wa habari leo Julai 18, 2018 jijini Dar es Salaam, Mkurugenzi wa Operesheni na Mafunzo wa Chadema, Benson Kigaila amesema barua hiyo inawaelekeza wakala atatambulishwa kwa msimamizi wa uchaguzi kwa barua ya chama, picha mbili za pasapoti na kitambulisho chochote chenye picha.

Hata hivyo, Kigaila amekosoa uamuzi huo wa Tume kwa madai hawajapewa mwongozo wowote wa mawakala siku ya kupiga kura, jambo linaloweza kusababisha sintofahamu kama ilivyokuwa kwenye uchaguzi wa jimbo la Kinondoni.

"Kwenye uchaguzi uliopita wa Kinondoni mawakala wetu waliambiwa hawana utambulisho wowote kutoka Tume, jana wametuandikia barua wanatoa masharti lakini hawasemi siku ya uchaguzi itakuwaje, mawakala watatambuliwa vipi," amesema Kigaila.

Kigaila amesema Tume hiyo haijayafanyia kazi malalamiko ya Chadema licha ya kuandikiwa barua na Katibu Mkuu wake, Dk Vincent Mashinji kukutana na Mkurugenzi wa Uchaguzi, Dk Athumani Kihamia.

Amesisitiza wataendelea kupigania haki ya wagombea wa chama hicho na wanakwenda kushinda kwenye uchaguzi huo.

"Mkurugenzi ametuambia ili kuepusha makosa yaliyofanyika kwenye uchaguzi wa Kinondoni mawakala waje na vitambulisho. Kumbe wanatambua Uchaguzi wa Kinondoni ulikuwa na kasoro lakini hawajamchukulia hatua zozote msimamizi wa uchaguzi wa Kinondoni kwa kuharibu uchaguzi," amesema.

Kwa upande wake, Mkurugenzi wa Kampeni na Uchaguzi wa Chadema, Reginald Munisi amewataka polisi kufanya kazi zao badala ya kuingilia uchaguzi kwa kuwakamata wagombea wa Chadema.

"Kuna kata 18 ambazo wagombea wa Chadema wameenguliwa. Mpaka sasa kuna maeneo watu wetu wamekataliwa rufaa zao, kwa mfano Rombo. Tumeandika malalamiko yetu kwa Tume," amesema Munisi.

WAZIRI MKUU: VIONGOZI WA KISIASA TUHAMASISHE WANANCHI KUENZI UTAMADUNI WAO


WAZIRI MKUU Kassim Majaliwa amewataka wanasiasa wakiwemo mawaziri na wabunge wawahamishe Watanzania kuendeleza utamaduni wao.

Ametoa wito huo leo (Jumatano, Julai 18, 2018) wakati akizungumza na wazee na wananchi wa Makunduchi mara baada ya kushuhudia maadhimisho ya sikukuu ya Mwaka-Kogwa yaliyofanyika Makunduchi, wilaya ya Kusini, mkoa wa Kusini Unguja, Zanzibar.

“Mawaziri wote, tuna dhamana ya kuwahamasisha Watanzania waendeleze utamaduni ili uwe ni jambo hai. Wabunge na wawakilishi tukiwa kwenye majukwaa, tusisitize Watanzania waendeleze utamaduni,” amesema.

Amesema Serikali ya Jamhuri ya Muungano wa Tanzania (SMT) pamoja na Serikali ya Mapinduzi Zanzibar (SMZ) zinasimamia uwepo wa utamaduni na zenyewe zinaongozwa na Ilani ya Chama cha Mapinduzi ambayo imelenga kuihamasisha  jamii kuuenzi,  kuulinda  na  kuudumisha utamaduni wa Mzanzibari na kushiriki katika uandaaji wa matamasha 50 ya utamaduni.

“Lazima utamaduni uendelezwe ndani na nje ya nchi na ni lazima tufanye jitihada tuwarithishe watoto utamaduni wetu. Kwa mfano, hapa Zanzibar mnalo tamasha la ZIFF, lile ni la kimataifa, vyombo vya muziki ni vya kisasa. Ni vema sasa, tukaangalia uwezekano wa kuwa na tamasha la huku chini ambalo litatumia ala za muziki za asili,” alisema.

Akizungumzia sherehe za Mwaka Kogwa, Waziri Mkuu alisema hii ni mara yake ya kwanza tangu azaliwe kuona watu wakichapana viboko si kwa ugomvi wala chuki, bali wakiwa na furaha.

“Mwaka Kogwa ni utamaduni wetu, pande zote za visiwani na zimekuwa zikifanyika kila mwaka lakini hivi sasa ni Makunduchi peke yake ambao mmeweza kuendeleza utamaduni huu, wengine wameacha kuadhimisha sherehe hizi,” amesema.

“Tanzania tuna makabila zaidi ya 120 wenye tamaduni na mila tofauti lakini si wote ambao wanaenzi mila na tamaduni zao. Utamaduni ni jambo muhimu nchini, utamaduni ni fursa ya kiuchumi kwa sababu watalii wanatoka kwao kuja Zanzibar kuangalia tukio kama hili, ni lazima tuuenzi,” alisisitiza.

Wakati huohuo, Waziri Mkuu amewapongeza wakazi wa Makunduchi kwa kutunza na kuhifadhi mazingira na amewataka waendeleze bidii ya kuyatunza.

“Kati ya mambo ambayo nimeyapenda sana, ni tabia yenu ya uhifadhi mazingira. Lazima niwapongeze wana-Makunduchi kwa kutunza na kuhifadhi mazingira. Kama msingekuwa watu wazuri mgeshafyeka misitu yote, na kusingekuwa na mvuto kama nilivyoona. Endeleeni kuhifadhi mazingira yetu ili yaweze kututunza,” alisema.

Naye Mkuu wa Mkoa wa Kusini, Bw. Hassan Khatib Hassan alisema wanafanya maadhimisho hayo ikiwa ni sehemu ya kuendeleza utamaduni na kuonyesha urithi kutoka kwa wazazi wao. “Tunaendeleza utamaduni huu sababu ni urithi kutoka kwa wazazi wetu. Ni upendo, amani na mshikamano,” alisema.

Mapema, Mkuu wa Wilaya ya Kusini, Bw. Idrissa Kitwana Mustafa alisema wamewaalika mabalozi wa Uturuki na Iran kwenye maadhimisho hayo kwa sababu utamaduni huo pia unafanyika kwenye nchi zao.

Akitoa shukrani kwa niaba ya wananchi wa Makunduchi, Mwakilishi wa jimbo la Makunduchi, Bw. Haroun Ali Suleiman alisema anaipongeza serikali ya awamu y atano kwa mambo ambayo imeyafanya kwa kuleta maendeleo kwa wananchi wake.

“Hakuna asiyeona, na kama mtu hataki kuona, basi hataona kabisa. TUnaomba utufikishie salamu zetu kwa Mhshimiwa Rais Magufuli,” alisema.

Alisema anaomba kuwe na ushirikiano wa karibu baina ya watendaji wa wilaya ya Kusini na ile ya Ruangwa ambako Waziri Mkuu anatoka ili watumishi wake waweze kubadilishana uzoefu na kuimarisha muungano.
 
IMETOLEWA NA:
OFISI YA WAZIRI MKUU,

WAZIRI KAIRUKI AKUTANA NA SHIRIKISHO LA MADINI LA NCHINI INDIA


Waziri wa Madini, Angellah Kairuki amekutana Wawekezaji kutoka Shirikisho la Madini ya Granite la nchini India (Federation of Indian Granite & Stone Industry) ambao wameonesha nia ya kuwekeza kwenye Sekta ya Uongezaji Thamani Madini ya Mawe yenye thamani ya Granite na Mable.

Akizungumza katika kikao kilichofanyika leo tarehe 18 Julai, jijini Dar es Salaam, Waziri Kairuki ameueleza ujumbe huo kuhusu adhma ya Tanzania kukakaribisha wawekezaji katika ujenzi wa vinu vya kuyeyusha madini ya metali, usonara pamoja na ukataji na ung’arishaji madini ya vito hususan madini ya Tanzanite ambayo kwa kiasi kikubwa yamekua yakisafirishwa nje ya nchi yakiwa ghafi.

“ Sheria yetu ya Madini ya Mwaka 2010 na Marekebisho yake ya mwaka 2017, imekataza usafirishaji wa Makinikia pamoja na madini ghafi nje, ndiyo maana tunakaribisha wawekezaji kwa ajili ya kuwekeza kwenye uongezaji thamani madini ndani ya nchi,” amesema Waziri Kairuki.

Pia, Waziri Kairuki amewashauri wawekezaji hao kukutana na Shirika la Madini la Taifa (STAMICO) ili kuona namna bora ya kushirikiana katika miradi mbalimbali ikiwemo ya mawe yenye thamani, bati na madini mengine.

Vilevile, Waziri Kairuki amelitaka shirikisho hilo kuona namna ambavyo linaweza kushirikiana na wachimbaji wadogo wa madini nchini hususan katika masuala ya masoko na mitaji.

Kwa upande wake, Mwenyekiti wa Shirikisho la Madini ya Granite na Sekta ya Mawe la nchini India, Keshava Murthy, amemweleza Waziri Kairuki kuwa, shirikisho hilo liko tayari kuwekeza kwenye madini ya granite pamoja na marble kwa kuanza na makontena kati ya 20-50 kwa mwezi.

Pia, Murthy ameongeza kuwa, Shirikisho hilo lina wanachama zaidi ya 1200 ambao wanajihusisha na shughuli za uongezaji thamani madini ya granite nchini humo.

Kuhusu ushirikiano na STAMICO, Murthy amemwahidi Waziri Kairuki kuwa, shirikisho hilo litakutana na shirika hilo kwa lengo la kubadilishana ujuzi ikiwemo kuangalia namna bora ya kushirikiana katika sekta husika.

Aidha, amemweleza Waziri Kairuki kuhusu maonesho ya  mawe yenye thamani yanayojulikana kama STONA FARE ambayo huandaliwa na shirikisho hilo  na kuongeza kuwa, ni miongoni mwa maonesho makubwa duniani.

Mbali na kukutana na Waziri Kairuki, wawekezaji hao wanatarajia kuendelea na ziara jijiji Dodoma ambapo wanatarajia kukutana na na Shirikisho la Wachimbaji wa Madini Tanzania, kutembelea Taasisi ya Jiolojia na Utafiti wa Madini Tanzania (GST) pamoja na kutembelea baadhi ya maeneo yenye uchimbaji wa Granite jijini Dodoma.

Kabla ya kuja nchini, wawekezaji hao walitembelea nchi za Namibia, Zimbabwe na Malawi kwa lengo la kutafuta fursa za uwekezaji kwenye madini hayo.

Kikao hicho pia, kimehudhuriwa na Mwakilishi kutoka Taasisi ya Uwekezaji Tanzania (TIC), Wataalam kutoka Wizara ya Madini wakiongozwa na Kaimu Kamishna Msaidizi wa Madini Kanda ya Mashariki Mhandisi Ally Maganga aliyemuwakilisha Kamishna wa Madini.

Ratiba Ya Ligi Kuu Bara Imetoka......Simba kuikaribisha Yanga

Shirikisho la Soka Tanzania (TFF) kupitia Bodi ya Ligi (TPLB) limetangaza ratiba mpya ya Ligi Kuu Bara kwa msimu wa 2018/19 itakayoanza Agosti 22 2018.

Mkurugenzi wa Bodi hiyo, Boniface Wambura, amesema ligi hiyo itahusisha jumla ya mechi 380 kutoka 240 ambazo zilikuwa zilichezwa msimu uliopita kutokana na ongezeko la timu.

Wambura ameeleza katika msimu wa 2017/18 ligi ilihusisha jumla ya timu 16 pekee lakini kuelekea msimu ujao kutakuwa na idadi ya timu 20 ambazo zimefanya kuwe na ongezeko la idadi ya mechi.

Yanga itaanzia ugenini huko Morogoro Agosti 23 kucheza na timu ya Mtibwa Sugar huku Azam FC wakianza nyumbani kukipiga na Mbeya City.  

Ratiba hiyo inaonesha pambano la watani wa jadi litapigwa Septemba 20 kwenye uwanja wa taifa na Simba watakuwa wenyeji wa Yanga.

Kwa upande wa timu zilizopanda ligi kuu msimu huu Alliance watacheza na Mbao FC, Biashara United wakianza na Singida United. JKT Tanzania watakipiga na KMC, African Lyon watacheza na Stand United huku Coastal Union wakicheza na Lipuli FC.

Aidha Afisa mtendaji mkuu wa bodi ya ligi, Boniface Wambura amesema mechi ya Ngao ya Jamii kati ya bingwa Simba na bingwa wa kombe la shirikisho Mtibwa Sugar itapigwa Agosti 18 kwenye uwanja wa CCM Kirumba Mwanza.

Msimu huu utashirikisha jumla ya timu 20 kutoka 16 zilizoshiriki msimu uliopita. Timu tatu zitakazoshika nafasi za chini moja itashuka moja kwa moja huku mbili zikicheza mechi na washindi wa pili na tatu wa ligi daraja la kwanza na wakifungwa wanashuka ila wakishinda wanabaki ligi kuu.

Waziri Mhagama Amtumbua Kaimu Mtendaji Mkuu wa Wakala wa Huduma za Ajira (TaESA)

Waziri wa Nchi Ofisi ya Waziri Mkuu (Sera, Bunge,  Kazi, Vijana, Ajira na Watu Wenye Ulemavu) Mhe. Jenista Muhagama  ametengua uteuzi wa Kaimu Mtendaji Mkuu wa Wakala wa Huduma za Ajira (TaESA) Bw. Saneslaus Boniface Chandarua kutokana na kutoridhishwa na utendaji wake wa kuisimamia Taasisi hiyo katika soko la ajira nchini.

Akizungumza na Wafanyakazi wa Taasisi hiyo katika ukumbi wa Taasisi hiyo, jijini Dares Salaam tarehe 17 Julai, 2018, Mhe. Mhagama amesema amefikia maamuzi hayo kutokana Mtendaji Mkuu huyo kushindwa kuisimamia Taasisi hiyo kutekeleza majukumu yake ya msingi ya kuweka mazingira wezeshi ya usimamizi na utoaji wa huduma za ajira nchini kwa kuhakikisha kuwa Huduma za Ajira zinazotolewa kwa umma zinakuwa bora zaidi, zenye tija na zenye kuwafikia wananchi wengi zaidi, badala yake Taasisi hiyo imeendelea kufanya kazi kwa mazoea na Mtendaji Mkuu bila kuchukua hatua.

“Serikali inaitegema TAESA kuwa ni Taasisi ya kwanza kujua fursa ngapi zinazotengenezwa katika kila sekta iwe sekta ya umma au binafsi, ili kuweza kuzalisha soko la ajira kwa vijana wengi wanaomaliza masomo yao hata hivyo haifanyi kazi hiyo ipasavyo. Huku tukizingatia asilimia 56 ya nguvu kazi tuliyonayo ni vijana na wengi wako katika kautafuta ajira mbalimbali “ amesema Muhagama

Akifafanua baadhi ya mambo ambayo Mtendaji Mkuu huyo ameshindwa kuyasimamia vyema ni pamoja na kuunganisha watafuta kazi na waajiri, kuratibu na kuwezesha upatikanaji wa ajira ndani na nje ya nchi, kukusanya, kufanya uchambuzi na kusambaza taarifa za soko la ajira kwa wadau na umma kwa ujumla na kushindwa kutambua fursa mbalimbali za ajira nchini na kuacha zikipita huku baadhi ya watendaji wa Taasisi hiyo wakijisahau kwa kushindwa kutimiza wajibu wao ipasavyo na Mtendaji mkuu bila kuchukua hatua.

“Serikali ya awamu ya tano inatekeleza miradi mingi ya maendeleo, ipo miradi ya ujenzi wa barabara, viwanja vya ndege, ujenzi wa stendi za kisasa na masoko makubwa, miradi ya maji, ujenzi wa hospitali, ujenzi wa Reli ya Kisasa, mradi wa Bomba la Mafuta toka Nchini Uganda, miradi ya kupeleka Umeme vijijini (REA) hapa nchini lakini mpaka sasa hamjaweza kubainisha fursa za ajira zitokanazo na miradi mingi kati ya hiyo na kuweza kuwaunganisha watafuta ajira, huo ni ufanyaji kazi wa mazoea,na haiendani na kasi ya serikali hii ” Amesema Mhe. Mhagama

Mhe. Waziri pia alionesha kutoridhishwa na utendaji wa Wasimamizi wa Kanda wa TaESA walio katika vituo mbalimbali nchini na kumtaka Kaimu Katibu Mkuu ambaye ni Kamishna wa Kazi kuwatathmini upya utendaji wao na kuwaondoa haraka ndani ya siku saba wale walioshindwa kutekeleza majukumu yao

“Inasikitisha kusikia msimamizi wa kanda anashindwa kufika katika maeneo yote ya Kanda yake kwa kusisitiza kuwa mtu huyo hawezi kujiita Msimamizi wa Kanda kama hatambui maeneo yote ya kanda yake. Mikoa hiyo ya kikanda imepangwa kimkakati na inafikika kiurahisi” amesema Mhagama.

Katika kuhakikisha Taasisi hiyo inafanya kazi kwa ufanisi Mhe Waziri ametoa maagizo matano kwa Katibu Mkuu Ofisi ya Waziri Mkuu (Kazi, Vijana, Ajira na Wenye Ulemavu), Kamishna wa Kazi nchini na Mkurugenzi wa Idara ya Ajira Ofisi ya Waziri Mkuu na maagizo hayo yanaanza kutekelezwa kuanzia sasa;

Agizo la kwanza ni Mkurugenzi Msaidizi wa Huduma za Ajira Bi.Kisa Kilindu kuhamia wizarani na Wafanyakazi wote wa TaESA wahamie mjini Dododma.

Katibu Mkuu Ofisi ya Waziri Mkuu (Kazi na Ajira ), anatakiwa kufanya mabadiliko makubwa katika kuhamisha watumishi waliopo makao makuu ya Taasisi na wasimamizi wa kanda wote.

Kuwasilisha ofisini kwake taarifa za kila mwezi na robo mwaka juu ya utekekezaji wa majukumu ya TaESA na mpango kazi wa kila tukio ambapo Mhe. Waziri amesema atafuatilia kila hatua ya utekelezaji wake.

Kuanzia sasa amewataka TaESA kusitisha kazi ya kuwaunganisha Watafuta kazi nje ya Nchi isifanyike mpaka watakapokaa vikao kwa kushirikiana na Kamishna wa Kazi na wadau wengine na kuweka utaratibu sawa, pia kazi hiyo itafanyika kwa watanzania wenye ujuzi wa juu na ujuzi wa kati tu, na itakuwa kwenye nchi zilizokwisha ingia makubalianona na Tanzania (bilateral Agreements) .

Mhagama maemuagiza Katibu Mkuu Ofisi ya Waziri Mkuu (Kazi na Ajira) na Menejimenti ya TaESA kuhakikisha kuwa wanavihusisha vyombo vingine vya Ulinzi na Usalama kuchunguza wale wote waliowahi kujihusisha, wanaoendelea na wanaotarajia kujihusisha na vitendo vya rushwa kuchukuliwa hatua haraka sana.

Ameagiza pia , Wakala Binafsi zitakazosajiliwa wawekewe utaratibu wa kuwa na kanzi data ya taarifa za watu watakaowaunganisha na kuwa na taarifa za huko wanakokwenda kufanya kazi na walete taarifa kamili za Mawakala wanaowaunganisha watanzania huko nje ya nchi.

Mhagama ameitaka TaESA kusimamia Wakala Binafsi wa Huduma za ajira ili watiize majukumu yao vizuri badala ya kuwa waajiri au kuwa sehemu ya mahusiano kati ya mwajiri na waajiriwa .

Kwa Mujibu wa Ibara ya Ibara 11 ya Mkataba wa Kimataifa Na. 88 wa mwaka 1948, unaohusu utoaji wa Huduma za Ajira, inaeeleza kuwa huduma za Wakala wa ajira zitatolewa bure kwa watafuta kazi hivyo TaESA wameagizwa kuzingatia hilo.

TaESA wanatakiwa kuandaa mpango kazi wa utekelezaji wa majukumu yao utakaoonyesha jinsi watakavyoshiriki katika kuelimisha vijana ili washiriki kikamilifu katika uchumi wa viwanda.

TaESA ni chombo kilichoanzishwa chini ya Sheria ya Wakala wa Serikali Na. 30 ya mwaka 1997 (Executive Agencies Act) (kama ilivyofanyiwa marekebisho mwaka 2009) na Tamko la Serilkali Na.189 la mwaka 2008 kutoka iliyokuwa

kituo cha Ajira Nchini (Labour Exchange Centre) iliyoanzishwa na Serikali. lengo la kuanzishwa kwa chombo hiki ni kuweka mazingira wezeshi ya usimamizi na utoaji wa huduma za ajira nchini kwa kuhakikisha kuwa Huduma za Ajira zinazotolewa kwa umma zinakuwa bora zaidi, zenye tija na zenye kuwafikia wananchi wengi zaidi.

Kamishna Jenerali wa Uhamiaji Tanzania Atoa ONYO Kali Kwa Wanaohifadhi na Kusafirisha Wahamiaji Haramu


Kamishna  Jenerali wa Uhamiaji Tanzania, Dkt. Anna Makakala amewataka watanzania wote nchini kutoshiriki kuwahifadhi ama kuwasafirisha wahamiaji haramu kwa njia za panya katika maeneo yao.

Makakala ameyasema hayo leo mara baada ya kumaliza ziara ya kikazi ya siku mbili mkoani Lindi, yenye lengo la kuzungumza na watumishi wa idara ya Uhamiaji juu ya maswala mbalimbali likiwemo la changamoto zinazowakabili.

Amesema Idara ya Uhamiaji iko makini kufuatilia kila kona ili kuwabaini wananchi wanaoshirikiana na wahamiaji na kwamba pindi watakapo wabaini sheria kali zitachukuliwa dhidi yao

“Sheria ya Uhamiaji kwa sasa imeongezewa makali, mtu atakayejihusisha na shughuli hiyo basi atatozwa faini isiyopungua shilingi milioni 20 au kifungo cha miaka 20 au vyote kwa pamoja, pia kutaifisha mali zote zitakazohusika kuwasafirisha wahamiaji hao”

Awali akisoma taarifa ya utendaji kazi ya Uhamiaji kwa Mkoa wa Lindi, Afisa Uhamiaji Mkoa, Abdallah Katimba amesema kutokana na doria zinazofanywa mara kwa mara katika nyumba za kulala wageni, vituo vya mabasi, barabara kuu ya Dar-es-salaam- Mtwara na njia za michepuko zinazotumiwa na wahamiaji haramu kuingia na kupitia ndani ya Mkoa wa Lindi na kuelekea nchi za kusini mwa Afrika waliweza kukamata raia wawili wa Vietnam, watano wa Ethiopia na mmoja wa Malawi na kuwafikisha mahakamani kwa makosa mbalimbali ya kiuhamiaji.

Katimba aliongeza kuwa, kuwepo kwa Mkoa wa Lindi katika mwambao wa bahari ya Hindi pamoja na kuwa jirani mwa Nchi ya Msumbiji umesababisha raia wengi wa Msumbiji kuingia nchini Tanzania na kulowea kutokana na shughuli za kiuchumi, kijamii na kitamaduni.

“Kwa kushirikiana na Mamlaka ya Vitambulisho vya Taifa (NIDA) katika utowaji wa vitambulisho vya taifa , kwa lengo la kuwabaini wahamiaji wasio raia wa Tanzania ambalo linaendelea hadi sasa jumla ya watu 8,123 wasio raia wa tanzania wamefanikiwa kuwabaini katika ofisi ya uhamiaji mkoa na wilaya zake.

MAGAZETI YA LEO ALHAMIS JULAI 19, 2018




MAJINA YA WALIMU WA AJIRA MPYA WALIOPANGWA KATIKA VITUO VYA KAZI KWENYE SHULE ZA MSINGI NA SEKONDARI JULAI, 2018 YATOKA. YAONE HAPA MAJINA HAYO ….

TAARIFA KWA UMMA KUHUSU AJIRA YA WALIMU WA SHULE ZA MSINGI NA SEKONDARI JULAI, 2018

Ofisi ya Rais – TAMISEMI inapenda kuutarifu Umma kuwa, jumla ya Walimu 4,840 wamepangiwa vituo vya kazi kwenye Shule mbalimbali za Msingi na baadhi kwenye Shule za Sekondari nchini. 

Walimu hao waliopangiwa vituo vya kazi wanatakiwa kuripoti katika Ofisi za Wakurugenzi wa Halmashauri zilipo shule walizopangiwa na baadaye kuripoti kwenye Shule walizopangiwa. 

Walimu wote wanatakiwa kuripoti kwenye vituo vyao vya kazi kuanzia tarehe 23 Julai, 2018 hadi tarehe 7 Agosti, 2018 wakiwa na mahitaji yafuatayo:
  • Vyeti halisi vya taaluma vya Kidato cha Nne na/au Kidato cha Sita;
  • Vyeti halisi vya kitaaluma vya mafunzo ya Ualimu katika ngazi husika; na
  • Cheti halisi cha kuzaliwa.
Walimu wote waliopangiwa vituo vya kazi wanaelekezwa kuwa:
  • Vituo vyao vya kazi ni Shule ya Msingi au Sekondari alizopangiwa na sio Makao Makuu ya Halmashauri;
  • Mwajiriwa atakayeripoti na kuchukua posho ya kujikimu kisha akaondoka katika kituo chake cha kazi alichopangiwa Serikali itamchukulia hatua kali kwa mujibu wa sheria na taratibu zilizopo; na
  • Hakuna Mwalimu atakayekubaliwa kubadilisha kituo kwa sababu yoyote ile. Kila mwajiriwa mpya anapaswa kuripoti katika kituo chake alichopangiwa na si vinginevyo. Waajiriwa wapya ambao watashindwa kuripoti katika vituo walivyopangiwa nafasi zao zitachukuliwa na Walimu wengine 5,220 wenye sifa waliokosa nafasi.
Wakurugenzi wa Halmashauri husika wawapokee Walimu waliopangwa kwenye Halmashauri zao kwa kuzingatia taratibu na kanuni zote za utumishi wa Umma, ikiwa ni pamoja na kutoa taarifa ya kuripoti kwao. Taarifa ya kuripoti waajiriwa hao itumwe Ofisi ya Rais- TAMISEMI ifikapo au kabla ya tarehe 10.08.2018 baada ya tarehe ya mwisho ya kuripoti.
 
Majina ya Walimu waliopangiwa vituo yanapatikana katika tovuti ya Ofisi ya Rais – TAMISEMI ya www.tamisemi.go.tz
 
Imetolewa na:
KATIBU MKUU OFISI YA RAIS – TAMISEMI

MGOMBEA UDIWANI KIMARA KWA TIKETI YA CCM APITA BILA KUPINGWA



Na Humphrey Shao, Globu ya Jamii

MKURUGENZI wa Halmashauri ya Wilaya ya Ubungo jijini Dar es Salaam John Kayombo amemtangaza Mgombea wa Chama Cha Mapinduzi(CCM) Pascal Manota kuwa mshindi katika uchaguzi mdogo ulioitishwa nchini katika Kata ya Kimara.

Kayombo  amemtangaza Manota kuwa Diwani Mteule kutokana na madiwani wengine kutoka vyama upinzani kushindwa kujibu hoja za mapingamizi aliyowawekea kama mapungufu wakati wa ujazaji wa fomu.

“Vyama vilivyoweza kuchukua fomu ya kugombea Udiwani katika Kata ya Kimara ni , ACT-Wazalendo, Chadema, CUF na CCM lakini kutokana na mapungufu yaliyojitokeza katika ujazaji wa fomu Pascal Manota namtangaza kama Diwani Mteule aliyepita bila ya kupingwa,”amesema Kayombo.

Kwa Upande wake Manota ambaye ni Diwani Mteule katika Kata ya Kimara amewetaka wapinzani kuacha siasa za uongo za kuwasingizia watendaji kuwa ndio wanaharibu uchaguzi wakati wao ndio wa kwanza kuvunja taratibu za uchaguzi na sharia zilizowekwa.

Amesema wagombea wote walichukua fomu na zikajazwa na kubandikwa katika mbao ya matangazo katika Kata, hivyo baada ya kuona mapungufu ya wagombea wake aliamua kuwawekea mapingamizi.Kutokana na mapingamizi hayo wagombea wote wametupwa nje.

Amesema kuwa sasa anasubiri kuapishwa ili aendelee kuwatumikia wakazi wa Kimara na hatimaye wapate maendeleo ya kweli kupitia Serikali ya CCM inayoongozwa na Rais Dk.John Magufuli.
Mkurugenzi wa Manispaa ya Ubungo , John Kayombo ambaye pia ndio Msimamizi wa Uchaguzi katika Halmashauri hiyo akitangaza matokeo ya Uchaguzi huo kuwa Ndugu Pascal Manota kapita bila kupingwa.
Diwani Mteule wa Chama Cha Mapinduzi Pascal Manota akisaini kitabu cha kupokea barua ya kuwa Diwani Mteule aliyepita bila kupingw akatika kata ya Kimara.
Diwani Mteule wa Chama Cha Mapinduzi Pascal Manota akipokea barua ya kuwa Mshindi wa uchaguzi mdogo kwa kupita bila kupingwa mara baada ya kuwashinda wapinzani wake kwa mapingamizi
Diwani Mteule wa Chama Cha Mapinduzi Pascal Manota akiongea na Waandishi wa Habari mara baada ya kutangazwa mshindi

RAIS DKT. MAGUFULI AWAANDALIA DHIFA YA KITAIFA VIONGOZI WA VYAMA VYA SIASA VYA AFRIKA PAMOJA NA CHAMA CHA KIKOMUNISTI CHA CHINA (CPC) WANAOSHIRIKI KATIKA MKUTANO HUO WA VIONGOZI JIJINI DAR ES SALAAM.


Rais wa Jamhuri ya Muungano ambaye pia ni Mwenyekiti wa Chama cha Mapinduzi (CCM) Dkt. John Pombe Magufuli akizungumza jambo na Mkuu wa Idara ya Mahusiano ya kimataifa na Waziri wa Mahusiano wa Kimataifa wa Chama cha Kikomunisti cha China (CPC) Song Tao wakati wa dhifa ya Kitaifa aliyowaandalia Viongozi wote wanaoshiriki Mkutano huo jijini Dar es Salaam.
Rais wa Jamhuri ya Muungano ambaye pia ni Mwenyekiti wa Chama cha Mapinduzi (CCM) Dkt. John Pombe Magufuli akizungumza jambo na Mkuu wa Idara ya Mahusiano ya kimataifa na Waziri wa Mahusiano wa Kimataifa wa Chama cha Kikomunisti cha China (CPC) Song Tao wakati wa dhifa ya Kitaifa aliyowaandalia Viongozi wote wanaoshiriki Mkutano huo jijini Dar es Salaam.
Viongozi wa vyama vya siasa kutoka nchi mbalimbali za Afrika pamoja na Chama cha Kikomunisti cha China cha CPC wakiwa katika Dhifa hio ya kitaifa Ikulu jijini Dar es Salaam.
Rais wa Jamhuri ya Muungano ambaye pia ni Mwenyekiti wa Chama cha Mapinduzi (CCM) Dkt. John Pombe Magufuli akiwa na mgeni wake Mkuu wa Idara ya Mahusiano ya kimataifa na Waziri wa Mahusiano wa Kimataifa wa Chama cha Kikomunisti cha China (CPC) Song Tao wakiangalia burudani kutoka katika kikundi cha TOT katika Dhifa hiyo Ikulu jijini Dar es Salaam.
Mkuu wa Idara ya Mahusiano ya kimataifa na Waziri wa Mahusiano wa Kimataifa wa Chama cha Kikomunisti cha China (CPC) Song Tao akizungumza katika hafla hiyo ya chakula cha jioni. 
Kikundi cha TOT kikitumbuiza katika Dhifa ya kitaifa Ikulu jijini Dar es Salaam. 
Rais wa Jamhuri ya Muungano ambaye pia ni Mwenyekiti wa Chama cha Mapinduzi (CCM) Dkt. John Pombe Magufuli akiagana na Mkuu wa Idara ya Mahusiano ya kimataifa na Waziri wa Mahusiano wa Kimataifa wa Chama cha Kikomunisti cha China (CPC) Song Tao mara baada ya hafla hiyo Ikulu jijini Dar es Salaam.
Rais wa Jamhuri ya Muungano ambaye pia ni Mwenyekiti wa Chama cha Mapinduzi (CCM) Dkt. John Pombe Magufuli akiagana na Rais mstaafu wa awamu ya nne Dkt. Jakaya Kikwete mara baada ya Dhifa ya Kitaifa Ikulu jijini Dar es Salaam. PICHA NA IKULU

BLOG RAFIKI

© Copyright EMMANUEL SHILATU - BREAKING NEWS BLOG
Back To Top