ADHABU YA VIBOKO MASHULENI KURUDISHWA TENA

 

Naibu Waziri wa Elimu na Mafunzo ya Ufundi, Philipo Mulugo akizindua tovuti ya www.shuledirect.co.tz itakayosaidia kuboresha utoaji wa huduma za elimu hapa nchini. Uzinduzi huo ulifanyika jijini Dar es Salaam. (Picha na Habari Mseto Blog)

DAR ES SALAAM, Tanzania

NAIBU Waziri wa Elimu na Mafunzo ya Ufundi, Philipo Mulugo, amerudisha adhabu ya viboko kwa wanafunzi wa shule zote ili kurudisha nidhamu iliyotoweka kwa wanafunzi.

Mbali na adhabu hiyo kurejea Mulugo pia amewataka walimu kuwanyang’anya simu wanafunzi watakaokutwa nazo kwani zinachangia kumomonyoa kiwango cha elimu kwa utumiaji wa facebook.

Akizungumza jijini Dar es salaam wakati wa utambulisho wa mfumo wa www.shuledirect.co.tz utakaosaidia kuboresha utoaji wa huduma za elimu nchini, Mulugo alisema kuwa ni jukumu la kila mwanajamii kushirikiana na Serikali katika kutatua changamoto zinazoikabili sekta ya elimu nchini.

Mulugo alisema kuwa japo karne hii ni sayansi, teknolojia na utandawazi ni vyema kuwahimiza wanafunzi kutumia mitandao katika kutafuta maarifa na kusoma tafiti mbalimbali kwa kuzingatia mila na desturi.

Pia alisema kuwa mfumo huo utasaidia wanafunzi, walimu na jamii nzima katika kuongeza ufahamu wenye tija katika kuchochoea maendeleo yataaluma.

Naye Mwanzilishi wa program hiyo, Faraja Nyalandu, alisema kuwa mpango huo ili malengo ya elimu bora yafikiwe ni muhimu kila mtu atimize wajibu wake.

Nyalandu alisema kuwa Mpango huo ni mfumo wa kuweza kujisomea katika mtandao kwaajili ya wanafunzi wa sekondari.

Alisema kuwa malengo ya mfumo huo ni kumuwezesha mwanafunzi kujisomea, kufanya mazoezi, kufahamu mtiririko wa anachopaswa kujifunza kupitia mtaala wa kuweza kushiriki katika majadiliano ya kiakademia.

on Tuesday, April 9, 2013