MCHIMBAJI AUAWA KWA RISASI NDANI YA MGODI HUKO MIRERANI...!!

Mfanyabiashara wa kampuni ya uwekezaji ya Tanzanite One inayochimba madini eneo la Mirerani, wilayani Simanjiro, Willy Mushi, ameuawa kwa kupigwa risasi na watu wanaoaminika kuwa ni wachimbaji wadogo baada ya kukutana mgodini chini ya ardhi.

Kamanda wa Polisi Mkoa wa Manyara, Akili Mpwapwa, alithibitisha kutokea kwa tukio hilo alilosema lilitokea saa 6:00 usiku wa kuamkia jana.

Kamanda Mpwapwa alisema tayari ametuma timu ya upelelezi inayoongozwa na Ofisa Upelelezi wa Mkoa wa Arusha kuchunguza zaidi tukio hilo.

Marehemu alipigwa risasi mbili kufuani upande wa kushoto alipoongozana na mfanyakazi mwenzake, Kennedy Masimbaji, kukikagua eneo la mgodi unaoingiliana na migodi ya wachimaji wadogo.

“Tulipofika kwenye mitobozano ambako kumepangwa mifuko ya viroba vya mchanga kutenganisha mgodi wetu na ile ya wachimbaji wadogo, ghafla tukashambuliwa kwa risasi ambazo zote zilimuingia marehemu kifuani na kufariki dunia papo hapo,” alisema Masimbaji.

Mfanyakazi mwingine wa Tanzanite One, Leonard Paul, alisema tukio hilo ni mwendelezo wa mashambulizi yanayodaiwa kufanywa na wachimbaji wadogo dhidi ya wafanyakazi wa mwekezaji pindi wanapokutana chini ya ardhi.

Alidai kuwa siku kadhaa zilizopita, uongozi ulilazimika kusimamisha kazi kutoa fursa ya polisi kuchunguza migogoro ya mitobozano. “Serikali lazima sasa ichukue hatua kuzuia matumizi ya silaha za moto chini ya migodi,” alisema Paul.

Kwa mujibu wa mdogo wa marehemu, Tumsifu Mushi, marehemu ameacha mjane na watoto wanne na taratibu za mazishi zinaendelea.

on Tuesday, July 23, 2013