GRATIAN MUKOBA AULA TENA .... ACHAGULIWA KUWA RAIS MPYA WA TUCTA

 

Mkutano Mkuu wa Shirikisho la Vyama vya Wafanyakazi (Tucta), umemchagua Rais wa Chama cha Walimu (CWT), Gratian Mukoba, kuwa Rais wa shirikisho hilo katika uchaguzi uliokwenda raundi mbili, baada ya raundi ya kwanza kukosa mshindi.

 

Katika raundi ya kwanza, kura zao zilishindwa kutimia baada ya kila mgombea kwenda chini ya nusu ya idadi ya wajumbe wa mkutano huo mkuu wa Tucta.

 

Katika marudio, Mkoba alimbwaga mgombea mwenzake, Baraka Igangula kwa kupata kura 172 wakati mpinzani wake alipata kura 110.

 

Akizungumza baada ya kutangazwa mshindi, Mkoba alisema anashukuru kwa kupata ushindi huo, kwani anatambua changamoto zilizopo za wafanyakazi.

 

Alisema yeye binafsi kwa kushirikiana na uongozi, watahakikisha wanawatumikia wafanyakazi kwa uwezo wao wote.

 

Mkoba alisema atahakikisha anarudisha imani kwa wafanyakazi, kama alivyoahidi katika kampeni zake na kikubwa ni ushirikiano ili waweze kufanikiwa. Kwa upande wake, Igangula aliwataka wafanyakazi kuungana kwa pamoja kujenga shirikisho.

 

Mkutano huo pia ulimrejesha katika kazi yake Katibu Mkuu wa TUCTA, Nicholaus Mgaya.

 

Awali, wakati wa mkutano huo ukiendelea, wajumbe wa kutoka Chama cha Wafanyakazi wa Viwandani, Biashara,Taasisi za Fedha, Huduma na Ushauri (TUICO) walisusa uchaguzi wa kumpata rais wa shirikisho hilo.

 

Wajumbe hao walisusa uchaguzi huo, wakiongozwa na Rais wao, Omary Ayuob Jumaa kwa madai kuwa Shirikisho limekataa kurudisha jina la rais huyo ili awe miongoni mwa wagombea wa nafasi hiyo.

 

Uchaguzi huo ambao waandishi wa habari hawakuruhusiwa, ila mpaka baada ya uchaguzi, ulisimamiwa na Profesa Hamza Tiko na kufunguliwa na Mkuu wa Mkoa wa Dodoma, Dk Rehema Nchimbi ambaye aliwaasa kufanya uchaguzi kwa utulivu na amani.

on Friday, August 8, 2014