KATIBU wa Halmashauri Kuu (NEC) Taifa ya CCM, Itikadi na Uenezi,
Nape Nnauye, amewatahadharisha wanaoeneza propaganda kwamba ana
msuguano na Katibu Mkuu wake, Wilson Mukama.Amewataka waache mara moja, vinginevyo hatasita kuwaumbua hadharani na kuwachukulia hatua zinazostahili.
Akizungumza na waandishi wa habari jijini Dar es Salaam jana, Nape alisema hana msuguano wowote na Mukama kama baadhi ya watu wanavyodai.
“Tunaendelea na ziara za kichama, mimi na baadhi ya viongozi wa kichama pamoja na mambo mengine pametokea juhudi za makusudi za kujaribu kupotosha ziara hizi, kwamba ziara hizi hazina baraka za chama kwa hiyo zimeleta mtafaruku kwenye sekretarieti na kuwa kuna msuguano kati yangu na katibu mkuu,” alisema.
Nape alisisitiza kuwa ziara hizo zina baraka za chama na zinasimamiwa na kuratibiwa na katibu mkuu ambaye ndiye kiongozi wake na mwenyekiti wa sekretarieti.
Kuhusu madai kwamba amepewa mabilioni ya fedha na mwenyekiti wa CCM,
Rais Jakaya Kikwete kuzunguka na hali hiyo ndiyo chanzo cha mgogoro wake
na Mukama, alisema ni uzushi wa kitoto kwa sababu hakuna fedha
inayoingia bila kupitia kwa katibu mkuu kama msimamizi wa mali za chama.“Uzushi huu si wa kweli, na juhudi hizi za kupotosha zinalenga kukatisha tamaa mageuzi mbalimbali yanayoendelea ndani ya chama chetu na hazitafanikiwa kwa sababu sekretatieti ina umoja chini ya Mukama,” alisema Nape.
Chanzo: Tanzania Daima
Post a Comment