TATIZO NI UTARATIBU NA SI UZEMBE WA SERIKALI

Naibu Waziri wa nchi ofisi ya Waziri mkuu Tawala za Mikoa na Serikali za Mitaa (TAMISEMI) Agrey Mwanri

SERIKALI imesema suala la watumishi kuchelewa kurekebishiwa mishahara yao baada ya kupandishwa vyeo umechangiwa na utaratibu uliokuwepo ambao ulikuwa ukimtaka mtumishi kukubali kwanza baada ya kupewa barua ya kupanda cheo. Hayo yalibainishwa mjini hapa jana na Naibu Waziri wa nchi ofisi ya Waziri mkuu Tawala za Mikoa na Serikali za Mitaa (TAMISEMI) Agrey Mwanri wakati alipokuwa akijibu swali la msingi la mbunge wa viti maalum Rachel Robert (CHADEMA) aliyetaka kujua ni kwa nini serikali haitekelezi maelekezo yaliyomo kwenye barua za watumishi wanaopandishwa vyeo wakati watatekeleza majukumu yao kwenye cheo alichopandishwa. “Kumekuwepo na utaratibu wa Manispaa zetu nchini kuwapandisha vyeo waajiriwa wake wakiwemo wauguzi wakiwapa barua na maelekezo yote yapasayo ya upandishwaji vyeo hivyo lakini (kamwe utekelezaji wa yale yaliyoelekezwa kwenye barua zao hayafanyiki pengine muda mrefu sana na hata zaidi ya miaka miwili bila utekelezaji,” alisema mbunge huyo. Akiendelea kujibu swali hilo Naibu Waziri huyo alisema awali mtumishi alitakiwa kukubali kwanza baada ya kupokea barua ya kupandishwa cheo na ndipo mwajiri wake aziwasilishe ofisi ya Rais Menejimenti ya Utumishi wa Umma. Alisema kwa sasa Serikali imechukua hatua madhubuti katika kushughulikia suala hilo kwa kusimika mfumo wa kieletroniki wa taarifa za utumishi (Human Capital Information Management System-LAWSON Version 9) katika halmashauri. Mwanri alifafanua kuwa maafisa rasilimali watu wamepatiwa mafunzo ya kutumia mfumo huu ambapo barua za kupandishwa cheo hutumwa kwa kutumia mfumo huo. “Hivyo, malipo ya mishahara sasa yanafanyika ndani ya muda mfupi baada ya mtumishi kupandishwa cheo, kwa mfano taarifa za mtumishi zinatakiwa kabla ya tarehe tano (5) mtumishi atapokea mshahara mpya ndani ya mwezi huu,” alisema Naibu Waziri huyo. Kufuatia hali hiyo Naibu Waziri huyo alitoa wito kwa halmashauri kuzingatia na kutumia mfumo huu kikamilifu ili kuepuka malimbikizo ya madeni ya watumishi, mara mtumishi anapopandishwa cheo taarifa ziingizwe katika mfumo na kutumwa mapema iwezekanavyo. chanzo: Tanzania Daima

on Wednesday, July 11, 2012