KULE SIMBA YATAKATA, HUKU YANGA YAPIGWA, NAO AZAM WANG'ANG'ANIWA

Simba,leo wameendeleza wimbi lao la ushindi katika mechi za Ligi Kuu Tanzania Bara baada ya kuichapa JKT Ruvu mabao 2-0 katika mchezo uliopigwa kwenye Uwanja wa Taifa, Dar es Salaam.

Hata hivyo, ushindi huo ulipatikana huku timu hiyo ikiwa pungufu baada ya mshambuliaji wao Mganda Emmanuel Okwi kutolewa kwa kadi nyekundu katika dakika ya 38 baada ya kumpiga kiwiko beki wa JKT Ruvu, Kessy Mapande.

Pamoja na kumiliki vyema mpira sehemu kubwa ya mchezo huo, JKT Ruvu walishindwa kabisa kuhimili vishindo vya Simba inayodhaminiwa na Kampuni ya Bia Tanzania (TBL) kupitia bia yake ya Kilimanjaro Lager, baada ya kujikuta ikilambwa mabao hao mawili.

Kwa ushindi huo wa pili mfululizo kwenye uwanja wake wa nyumbani, Simba imefanikiwa kufikisha pointi sita na hivyo kuwa kileleni kwenye msimamo wa ligi hiyo inayoshirikisha timu 14.

Kiungo mkabaji Amri Kiemba, ndiye aliyekuwa wa kwanza kuipatia Simba bao katika dakika ya 47 baada ya shambulizi kali ambapo mabeki wa JKT Ruvu walishindwa kuwa makini kuondosha hatari.

Katika dakika ya 72, Haruna Moshi ‘Boban’, aliipatia Simba bao la pili baada ya kupokea pasi safi kutoka kwa Mrisho Ngassa ambaye katika mchezo huo, alionekana kuwa mwiba mkali kwa JKT Ruvu.

Wakati huohuo huko mkoani Morogoro mji kasoro bahari timu ya Yanga pia ya jijini Dar es salaam imechezea kichapo cha magoli 3-0 baada ya kutandikwa bila huruma na wakata miwa Mtibwa Sugar kwenye uwanja wa Jamhuri mjini Morogoro

Magoli ya Mtibwa Sugar yamefungwa na wachezaji Dickson Daud dakika ya 12, na Hussein Javu dakika ya 43 na 76

on Wednesday, September 19, 2012