SANAMU YA SIR ALEX FARGUSON YAINULIWA: CHEKI VIDEO MAKOCHA NA WACHEZAJI MBALIMBALI WAKIMZUNGUMZIA

 

Sir Alex Ferguson amesema anasikia fahari kubwa baada ya hapo jana kuanuliwa rasmi kwa Sanamu yake mbele ya Uwanja wa Klabu ya Manchester United, Old Trafford, mbele ya Lango Kuu la kuingiliwa Jukwaa liitwalo Sir Alex Ferguson.

Uamuzi wa kuunda Sanamu ya Shaba yenye Urefu wa Futi 9 ulichukuliwa Novemba Mwaka 2011 mara baada ya Ferguson kutimiza Miaka 25 ya utumishi kama Meneja wa Manchester United kazi ambayo aliianza rasmi tarehe 6 Novemba 1986.

Katika uanuzi huo, Mastaa wa zamani wa Man United, kina Eric Cantona, Ruud van Nistelrooy, Ole Gunnar Solskjaer, Edwin van der Sar, Peter Schmeichel, Andy Cole, Dwight Yorke, Bryan Robson na Ndugu Gary na Phil Neville walijumuika na Wachezaji wa sasa pamoja na Mashabiki wengi huku David Beckham na Cristiano Ronaldo wakituma ujumbe uliorekodiwa na kuonyeshwa.

Ferguson, Miaka 70, alitoa shukrani zake kwa Klabu na Wachezaji wote kwa kumfikisha hapo alipo na alisema: “Wangetengeneza Sanamu za Wachezaji wote kwa sababu wao ndio waliotupa mafanikio. Kutoka Mwaka 1986, Wachezaji wametuletea raha kubwa!”

MATAJI ALIYOTWAA FERGUSON:

-LIGI KUU ENGLAND 12 - 92-93, 94-94, 95-96, 96-97, 98-99, 99-00, 00-01, 02-03, 06-07, 07-08, 08-09, 10-11.

-UEFA CHAMPIONZ LIGI 2 - 98-99, 07-08

-European Cup Winners' Cup 1 - 90-91

-UEFA Super Cup 1 - 1991

-FIFA Intercontinental Cup 1 - 1999

-FIFA Club World Cup 1 - 2008

-FA Cup 5 - 89-90, 93-94, 95-96, 98-99, 0304

-LIGI Cup 4 - 9192, 05-06, 08-09, 09-10

-NGAO ya JAMII 10 - 90, 93, 94, 96, 97, 03, 07, 08, 10,11

Nae Mkurugenzi Mtendaji wa Man United David Gill alimwelezea Ferguson: "Watu watasema vitu vingi kuhusu kuwapandishia Wachezaji [Maarufu ikiitwa ‘Hairdryer’] na Fergie Taimu lakini kitu muhimu ulicholeta kwenye Klabu hii ni kuirudishia tena heshima yake!."

David Gill, akiulizwa ni kwanini Mke wa Ferguson, Lady Cathy, ndie aliechaguliwa kuianua Sanamu hiyo, alijibu: “Yeye ndio sapota mkubwa wa Sir Alex na, nadhani, Ferguson anamwogopa kidogo!”

Ferguson alimshukuru Mkewe kwa kumsapoti katika maisha yao yote na akatania: "Cathy ameahidi kila Jumamosi asubuhi atakuja hapa na kuipigia goti hii Sanamu!!"

David Beckham, mmoja wa Wachezaji wa zamani wa Man United, alituma ujumbe uliorekodiwa kwa Ferguson na alisema: “Ni Siku ya kustajabisha kwako, Familia yako na Klabu. Napenda niseme asante sana kwa yale yote uliyonifanyia mie! Wakati wangu nilipokuwa Man United ndio wakati bora kabisa!”

Ronaldo wa Real Madrid, kwenye ujumbe uliorekodiwa kwa Ferguson, alisema: “Hongera Bosi! Unastahili kwa Asilimia Mia Moja!”

Straika wa zamani wa Man United na Netherlands, Van Nistelrool, alisema: “Yote yanayosemwa hapa hayawezi kulinganishwa na mafanikio aliyopata ambayo hayasemeki. Ni Mtu mwenye Dira ya kuona mbali, anaweza kujenga Timu upya na hilo amefanya mara nyingi katika Miaka yake 26.”

Nahodha wa zamani wa Man United na England Bryan Robson alisema: “Ukipata heshima kama hii kutoka Klabu kubwa kama Manchester United basi ni lazima umepata mafanikio makubwa na umepata vitu zaidi kupita Watu wanavyoweza kufikiria!”

Kipa wa zamani wa Man United, Peter Schmeichel, alitamka: “Anastahili. Sidhani kama kuna Mtu hata mmoja humu Nchini na katika Dunia ya Soka ambae ameweza kusababisha mafanikio makubwa kwa Klabu kama yeye!”

Straika wa zamani wa Man United na England Andy Cole alisema: “Ni Mtu wa kustajabisha, Ni Meneja wa ajabu na ndio maana Watu wengi na Wachezaji wengi wa zamani wamekuja hapa!”

on Sunday, November 25, 2012