Bozize amtimua Waziri wa Ulinzi

 

Rais Francois Bozize wa Jamhuri ya Afrika ya Kati amemfukuza kazi Waziri wa Ulinzi nchini humo pamoja na Mkuu wa majeshi kutokana na kushindwa kuwadhibiti waasi wa Seleka.

Katika tangazo lililotolewa kupitia kituo cha radio cha taifa nchini humo, Rais Bozize amelikosoa jeshi kwa kushindwa kukomesha harakati za waasi kuukaribia mji mkuu wa nchi hiyo Bangui kiasi cha kufikia umbali wa kilometa 75 karibu na mji huo.

Waziri wa ulinzi aliyefukuzwa kazi ni mtoto wa kiume wa rais Bozize anayeitwa Jean Francis Bozize. Hatua hiyo inachukuliwa wakati waasi wa kundi la Seleka wakiwa wametangaza kusitisha harakati zao za kuelekea Bangui.

Kutokana na kuendelea kwa mzozo nchini humo Umoja wa Mataifa umetoa mwito kwa pande zote mbili kukaa katika meza ya majadiliano na kutafuta suluhu ya matatizo yao ukisema kuwa uko tayari kuyaratibu mazungumzo hayo.

Msemaji wa umoja huo, Martin Nesirky, ameliambia shirikia la habari la AFP kuwa wanaendelea kufuatilia hali ya mambo katika Jamhuri ya Afrika ya Kati kwa umakini mkubwa.

on Friday, January 4, 2013