MSIMBAZI WAIGEUKA TFF

  *WAITAKA TFF KUTOA SABABU KWANINI WABADILISHE MWAMUZI WA KIPUTE CHA WATANI WA JADI GHAFLA!

      

ZACHARIA HANS HOPPE

Na Baraka Mpenja wa Fullshangwe Dar es salaam

WEKUNDU wa Msimbazi Simba “Taifa Kubwa” wameshangaa na maamuzi ya ghafla ya shirikisho la soka nchini Tanzania TFF kufanya maamuzi ya kubadilisha mwamuzi wa kati atakayechezesha kipute cha jumamosi cha watani wa jadi katika dimba maridhawa la taifa jijini Dar es salaam.

Mwenyekiti wa Kamati ya Usajili ya Simba,  mjumbe wa kamati ya utendaji ya klabu hiyo na mratibu wa timu katika mashindano, Kaptein  Zacharia Hans Poppe  ameimabia FULLSHANGWE kuwa wamegundua kuwepo kwa njama za watani wao wa jadi kutokana na mabadiliko hayo yaliyofanywa bila kukaa na timu husika.

“Yanga wana mchecheto na timu ya vijana ya Simba, wana wasiwasi kubwa sana na ndio maana wameanza njama. Toka wiki iliyopita walitaka kubadilishia mwamuzi tofauti na Israel Nkongo aliyepangwa toka mwanzo”. Alisema Poppe.

Poppe amesema viongozi wa kamati ya utendaji ya Simba wanakutana kujadili suala hilo na wamewataka wanahabari kuwabana TFF kueleza sababu za kufanya mabadiliko hayo bila taarifa.

Kiongozi huyo alihoji kama Nkongo siku hiyo atakuwa na dharura au atakuwa mgonjwa siku ya jumamosi?

“Sisi habari hizi tumeziona kwenye mitandao, nasikia waandishi waliuliza katika mkutano  wa TFF kwanini wamebadilishe mwamuzi, lakini TFF wametuma habari kuwa mwamuzi atakuwa Saanya kutoka Morogoro, watoe sababu za msimgi kwanini wamefanya hivyo.”. Alisema

Saanya kutoka mji kasoro bahari Morogoro ndiye  ameteuliwa kuchezesha pambano la watani wa jadi, Simba na Yanga SC  siku ya jumamosi huku akisaidiwa na Samuel Mpenzu wa Arusha, Jesse Erasmo kutoka Morogoro, wakati  mwamuzi msaidizi atakuwa Hashim Abdallah  wa Dar es Salaam.

Kamisaa wa mechi hiyo atakuwa Emmanuel Kavenga kutoka Mbeya wakati mtathmini wa waamuzi atakuwa ni Leslie Liunda wa Dar es Salaam.

Mashabiki watalipa  Sh. 5,000 kwa lugha ya mitaani “Buku Tano”  kikiwa kiingilio cha chini zaidi katika sehemu ya viti vya Rangi ya Bluu. 

Viti vya rangi ya kijani itakuwa sh. Elfu saba (7000/=),  wakati viti vya rangi ya chunga itakuwa sh. Elfu kumi (1000).

Kwa wale wenye pesa zao viingilio vitakuwa ni Sh. 15,000 kwa VIP C, Sh. 20,000 kwa VIP B na Sh. 30,000 kwa VIP A.

Ofisa Habari wa Shirikisho la Soka Tanzania (TFF), Boniface Wambura Mgoyo alisema kuwa viingilio hivyo ni sawa na viingilio vya mchezo wa mzunguko wa kwanza wa ligi hiyo baina ya klabu hizo  Oktoba 3 mwaka jana ambapo zilitoka sare ya 1-1. 

Wambura alisema tiketi zitaanza kuuzwa siku moja kabla ya mchezo, yaani Ijumaa wiki hii katika vituo mbalimbali vitakavyotajwa.

Yanga wanakumbuka kipigo cha 5-0 msimu wa mwaka jana na kinawazunguka zaidi vichwani na wanahitaji kulipa kisasi msimu huu ambapo tayari ni mabingwa, wakati Simba wana hasira ya kupoteza nafasi ya ubingwa na mshindi wa pili msimu huu.

Simba kwa sasa inawatumia vijana zaidi wakati Yanga inawatumia mafaza wote na vijana wake.

Tusubiri nini kitatokea siku ya jumamosi uwanja taifa jijini Dar es salaam, majira ya saa kumi kamili jioni kwa saa za Afrika Mshariki.

Yanga wameweka kambi yao kisiwani Pemba katika hoteli ya Samail mkabala na benki ya PBZ, wakifanya mazoezi Uwanja wa Gombani wakati Simba wameweka kambi maeneo ya Mbweni JKT Zanzibar wakifanya mazoezi kwenye Uwanja wa Mao Dze Tung.

on Tuesday, May 14, 2013