Pamba kilo 23,000 yachakachuliwa

PAMBA yenye uzani wa takriban kilo 23,100 ya thamani ya sh milioni 16.1 mali ya Hamisi Lukelesha (25) mkazi wa Kijiji cha Kabila, wilayani Kishapu, imekataliwa kununuliwa na Kampuni ya Fresho Investment Ltd baada ya kugundulika kuwa imechanganywa na maji na mchanga.

Shehena hiyo ya pamba ilisafirishwa kwa lori lenye namba T 309 ARH aina ya SCANIA tani 18.4 na kufikishwa kiwandani hapo juzi kwa lengo la kuuzwa.
Mkurugenzi Mtendaji wa kiwanda hicho, Fred Shoo, aliwaonesha waandishi wa habari shehena ya pamba hiyo wakati ikipakuliwa katika kinu na kufanyiwa uchunguzi na wataalamu wa zao hilo mbele ya mkulima mwenye mali hiyo.
Shoo alisema kwa kawaida pamba inapochanganywa na maji na kufungwa katika mafurushi au marobota huoza na kutoa harufu mbaya kutokana na joto na mkandamizo ghalani au kwenye gari, jambo lililofanya kampuni yake kubaini dosari hiyo kabla ya kuinunua.
Alitoa wito kwa Bodi ya Pamba nchini, wakuu wa mikoa, wilaya, watendaji wa kata na vijiji kuwaelimisha wakulima wa zao hilo vijijini ili kuepukana na hasara wanayoweza kuipata endapo pamba yao itakataliwa sokoni na kurudishwa.
Naye Lukelesha alikiri kuwapo kwa takataka na maji katika shehena yake ya pamba na kuelekeza lawama kwa familia yake kwa uzembe uliosababisha kuharibika kwa pamba yake.
Timu ya wataalamu wa kinu cha kuchambua pamba wakiongozwa na Meneja wa kiwanda, Robert Ndallahwa, walidai kuwa uchakachuaji wa zao hilo hufanywa kwa makusudi ili kuongeza uzito kwa lengo la kupata faida zaidi, jambo linaloharibu ubora wa zao hilo.
TANZANIA DAIMA

on Thursday, August 8, 2013