Waliochakachua fidia Mloganzila kuchunguzwa

 

Serikali itachunguza orodha ya vitu vilivyolipwa fidia wakati wa uthamini wa mali za wakazi wa kijiji cha Mloganzila jijini Dar es Salaam , baada ya wananchi kudai wamepunjwa na majalada ya mali kutoweka kinyemela.

Hatua hiyo ilitangazwa na Waziri Mkuu Mizengo Pinda, baada ya kulalamikiwa na wanavijiji kuwa wathamini wa Wizara ya Ardhi, Nyumba na Maendeleo ya Makazi walichakachuua fidia ya mali zao.

Eneo la Mloganzila limekuwa na mgogoro wa ardhi karibu miaka 10 baada ya serikali kulichukua kwa wananchi ili kujenga Chuo Kikuu kipya cha Afya na Tiba pamoja na hospitali ya kisasa.

Hata hivyo ilijimilikisha bila kuwalipa wananchi fidia ya ardhi kwa maelezo kuwa lilikuwa ardhi ya kampuni ya umma ya kusindika nyama hivyo bado ni mali yake ikiwalipa fidia ya majengo na mazao lakini si ya ardhi.

Wakazi hao walimweleza Waziri Mkuu Ijumaa wiki hii alipozuru eneo hilo kuwa baadhi ya taarifa za mali zao zimenyofolewa na kuchakachuliwa kwenye majalada na kuambulia Sh 50,000.

Aliwaambia kuwa ipo sheria ya viwango kwa kila uthamani inayotaja kiwango cha fidia kwa kila kinachothaminiwa hivyo lilikuwa jukumu la wananchi kuijua na kufuatilia.

Pia aliwaambia kuwa serikali itaangalia orodha ya kilichothaminiwa katika maeneo yao ili kubaini kasoro na kuzirekebisha.

Mwanakijiji mmoja wa Mloganzila alimweleza Waziri Mkuu licha ya kumiliki nyumba ya kisasa ya vyumba sita pamoja na mazao mengi aliambulia fidia ya milioni tano.

Alipolalamikia kupunjwa fidia alikwenda kuangalia jalada lake na kubaini kuwa taarifa za mali zake zilinyofolewa na kudai kuwa amepunjwa.

Wananchi wengi walilalamika kuwa licha ya eneo hilo kuwa mali ya umma wao ni Watanzania wanaostahili fidia kama ambavyo Wanabagamoyo watakavyofidiwa na kujengewa nyumba na mradi wa bandari ya Bagamoyo.

Walihoji sababu za kuwafidia ardhi na mali wakazi wa Chasimba waliovamia eneo la Wazo Hill mali ya kiwanda cha sementi cha Heidelberg, kulipwa fidia ya maendelezo na ya ardhi.

Pia walipinga serikali kuwapa viwanja Mabwe Pande watu waliojitumbukiza na kuishi mabondeni Jangwani na Msimbazi tena kwa ujeuri lakini inawapunja fidia, kuwanyima viwanja na kuchukua ardhi ya wanavijiaaji wa Mloganzila.

Wananchi karibu 3,000 wa kijiji cha Mloganzila wameondolewa eneo hilo na kulipwa fidia ya kuendeleza ardhi hiyo waliyodai ni ndogo kupindukia ikiwa ni Sh.6,000.

CHANZO: NIPASHE JUMAPILI

on Monday, August 19, 2013