POLISI WACHUNGUZA MLIPUKO UWANJA WA NDEGE

 

Mlipuko mdogo ulisikika katika uwanja wa ndege wa JKIA

Polisi wa kupambana na ugaidi nchini Kenya wameanzisha uchunguzi kubaini chanzo cha mlipuko mdogo uliotokea katika mkahawa mmoja katika uwanja wa kimataifa wa ndege wa JKIA, Nairobi

Pia wanachunguza ikiwa mwanamume raia wa Somalia aliyepatikana ameuawa katika mtaa wa Shauri Moyo mjini Nairobi alihusika na mlipuko huo Alhamisi usiku.

Mwili wa mwanamume huyo mwenye umri wa makamo, ulipatikana katika kiti cha nyuma cha gari iliyokuwa imefyatuliwa risasi nyingi karibu saa tano asubuhi siku ya Alhamisi.

Ugunduzi huu ulijulikana saa moja baada ya mlipuko kuripotiwa katika uwanja wa ndege wa kimataifa wa Jomo Kenyatta.

Gari hilo lilipatikana katika mtaa wa Shauri Moyo milango yote ikiwa imefunguliwa. Magurudumu ya gari hilo yalikuwa yamepasuka.

Walioshuhudia tukio hilo waliambia polisi kuwa wanaume wawili raia wa kisomalia, walishuka kutoka kwa gari hilo la kutoroka.

Polisi walipoangalia ndani ya gari walipata mwili wa mtu huyo ukiwa na damu .

Pia walipata kikombe cha moja ya mikahawa iliyo katika uwanja huo , ishara kuwa walikuwa wametembelea mkahawa huo ilio katika uwanja wa ndege.

Polisi waliweza kutegua bomu lililopatikana kwenye kiti cha nyuma cha gari hilo

Polisi pia wanachunguza picha za CCT za gari ambalo lilikaidi amri ya polisi kusimama likitoka katika uwanja huo wa ndege

Hata hivyo awali, mkuu wa polisi David Kimaiyo alisema kuwa mlipuko uliosikika katika uwanja huo ulisababishwa na Balbu ya ta iliyoanguka na kusababisha moto.Chanzo BBC Swahili

on Saturday, January 18, 2014