WASOMI WATETEA MFUMO WA MUUNGANO

               

 

WASOMI mbalimbali wa vyuo vikuu vya Dodoma (UDOM) na Dar es Salaam (UDSM), wametetea mfumo wa Muungano wa Tanganyika na Zanzibar kwa kudumisha amani na utulivu licha ya changamoto zinazojitokeza.

Walisema hayo walipohojiwa na gazeti hili kwa nyakati tofauti jana. Walisema Muungano huo ni wa kipekee katika Bara la Afrika na duniani kwani kwa kipindi chote cha miaka 50, utulivu, amani na mshikamano, vimedumishwa.

“Duniani kote hali ya amani hasa kwa miaka ya hivi karibuni ni ya kutatanisha na kutawaliwa na vurugu za maandamano ya kupinga mambo mbalimbali, zikiwemo serikali, lakini kwa Muungano wa Tanzania, hali ni shwari na wananchi wanaishi kwa ushirikiano na mshikamano mkubwa, ” alisema Mhadhiri wa UDOM, ambaye hakutaka jina lake litajwe.

Mhadhiri huyo aliungwa mkono na wenzake wawili.

Mkuu wa Idara ya Sayansi ya Siasa na Utawala ya UDSM, Dk Benson Bana, alisema jambo la msingi kwa sasa ni kwa Watanzania kutafuta muafaka wa kuendeleza umoja na mshikamano, badala ya kung’ang’ania mjadala wa mfumo wa serikali ngapi.

Hata hivyo, alibainisha kuwa kwa mtazamo wake, anaona mfumo bora utakaoendeleza mshikamano kwa Watanzania na kutatua kero zote ni ule utakaoimarisha na kudumisha Muungano.

Akizungumza na gazeti hili Dar es Salaam jana, Dk Bana alifafanua kuwa hakuna mfumo wowote utakaowekwa au kuchaguliwa uwe wa serikali moja, mbili au tatu, ambao hautakosa mazuri na mapungufu bali jambo la msingi kuleta umoja na mshikamano wa taifa.

Alisema wakati umefika kwa Watanzania kutumia fursa hiyo ya kupata Katiba mpya kwa kukuna vichwa na kutafuta mfumo wa serikali utakaoendana na hali halisi ya uchumi, kisiasa na kijamii.

Kwa mtazamo wake alisema jibu ni Serikali moja, itakayokuwa na dola moja itakayoendeleza mshikamano na kuwaunganisha Watanzania wote wa Bara na Zanzibar.

Kwa upande wake, Waziri wa Nchi Ofisi ya Makamu wa Rais (Muungano), Samia Suluhu, amesema pande zote mbili za Muungano zinafanya kila juhudi za kuhakikisha kwamba kero za Muungano zinashughulikiwa na kupatiwa majibu muafaka kwa majadiliano.

Alifafanua kwamba mambo ambayo yanashughulikiwa ni pamoja na yanayohusu uchumi ambayo kwa mipango iliyopo hivi sasa yatapatiwa ufumbuzi wa kudumu.

CHANZO:HABARILEO

(MM)

on Wednesday, March 12, 2014