Tanesco yaomba radhi wateja wake

TAARIFA YA HITILAFU ZA UMEME ZILIZOSABABISHWA NA MVUA ZILIZONYESHA KATIKA JIJI LA DAR ES SALAAM TAREHE 5 NOVEMBA 2015

Shirika la Umeme Tanzania (TANESCO) linapenda kutoa taarifa kwamba maeneo kadhaa ya jiji la Dar es Salaam yalipata tatizo la umeme kutokana na mvua kubwa na upepo zilizonyesha katika jiji la Dar es Salaam kuanzia majira ya saa tatu asubuhi. 

Pamoja na ukweli kwamba Shirika lilikuwa limewaweka tayari mafundi katika mikoa yote kukabiliana na tatizo lo lote la umeme, hali hiyo ya mvua ilifanya umeme kukatika katika maeneo mengi. 

Baadhi ya maeneo yaliyoadhirika na hali hiyo kwa vipindi tofauti ni pamoja na Temeke, Kigamboni, Mbagala hadi Mkuranga na Chang'ombe baada ya gari kugonga nguzo ya umeme katika eneo la Mkuranga na upepo mkali kuezua bati kutoka kwenye jengo katika eneo la Shauri moyo na kulirusha juu ya line ya umeme inayoanzia Ilala hadi Mkuranga.

Eneo lingine ni Mandela Road hadi Tabata baada ya mvua na upepo kusababisha wire kukatika katika kwa span mbili eneo la LandMark Hotel.

Eneo lingine ni Kimara hadi Kibamba kutokana na Transformer iliyolipuka eneo la Kimara na nguzo mbili za line kubwa zilizoanguka kutokana na mvua.

Eneo la kati kati ya jiji lilipata hitilafu ya muda mfupi baada ya upepo mkali kudondosha kamba inayotumika kwenye ujenzi kutoka jengo linalojengwa karibu na yaliyokuwa makao makuu ya NMB na kudondoka kwenye line ya umeme ya C8.

Wateja wanaopatia umeme kutoka kituo cha Mbezi waliathirika na tatizo la Cable ya 33kV na d.c supply kwenye kituo hicho. Maeneo ya Chuo Kikuu cha Dar es Salaam, Chuo kikuu cha Ardhi, Makongo, Mwenge na Changanyikeni yaliathirika kwa muda.

Mafundi wetu walifanya jitihada kubwa japo katika mazingira ya mvua kurekebisha matatizo hayo katika muda mfupi kadiri ilivyowezekana. 

Pamoja na changamoto hii, tunapenda kuwahakikishia wateja wetu nchi nzima kwamba hali ya umeme imeendelea kuimarika na umeme umekuwa ukipatikana nchi nzima ukiacha hitilafu ndogo za hapa na pale za kiufundi.

Kulingana na tahadhari zilizotangulia kutolewa na mamlaka ya hali ya hewa huenda mvua hizi zilizoanza zikaendelea kwa muda mrefu hivyo tunawaomba ushirikiano kutoka kwa wananchi katika kukabiliana na adhari kama hizi.

Tunawaomba radhi wateja wote walioathiriwa na hali hii.

Imetolewa na Ofisi ya Uhusiano TANESCO Makao

on Friday, November 6, 2015