Mkuu wa Mkoa wa Dodoma Dkt. Binilith Mahenge na ujumbe alioambatana nao wakikagua mradi wa maji ya chemichemi kwenye kijiji cha Kongwa Maji
Mkuu wa Mkoa wa Dodoma Dkt. Binilith Mahenge na ujumbe alioambatana nao wakikagua mashine ya kusukumia maji kwenye mradi wa maji ya chemichemi kijijini Kongwa Maji
Mkuu wa Mkoa Dodoma Dkt. Binilith Mahenge akiwasalimia Watoto wenye Ulemavu wa Viungo na matatizo ya akili wanaotibiwa kwenye kituo cha Watoto cha Mlali Kongwa.
.....................................................................................................
Na Ofisi ya Mkuu wa Mkoa Dodoma
Mkuu wa Mkoa wa Dodoma Dk. Binilith Mahenge amesema Mkoa wa Dodoma hauna sababu zozote za kukumbwa na tatizo la upungufu wa Chakula wala Njaa kwa wananchi wake kwa kuwa unazo fursa za kutosha za kuzalisha mazao ya chakula yanayotosheleza mahitaji ya Mkoa.
Aidha amesema mkoa huo una fursa za kuzalisha mazao ya biashara yatakayoweza kuwainua kiuchumi wa mwananchi na Mkoa kwa ujumla.
Dk. Mahenge ameyasema hayo mwishoni mwa wiki akiwa katika ziara Wilayani Kongwa ikiwa ni mwendelezo wa ziara yake ya kutembelea Wilaya za Mkoa wa Dodoma.
Kufuatia hali hiyo, Mkuu huyo amewataka Viongozi na wataalamu kuwasimamia wananchi kupanda mazao yanayotumia maji kidogo na kustawi kwa ufanisi Mkoani Dodoma kama Mtama, Uwele, Muhogo, Alizeti na Sasa zao la Korosho lililothibitika kustawi vizuri kwenye Ardhi ya Dodoma.
Aidha amewataka viongozi na Wataalamu wa kilimo wa Wilaya zote za Mkoa wa Dodoma kuhakikisha wanawaelimisha na kuwasimamia wananchi kutekeleza mkakati wa kilimo wa Mkoa unaolenga kuzalisha chakula cha kutosheleza mahitaji ya Mkoa, kwa kuachana na kilimo cha mazoea badala yake unasisitiza kilimo cha maarifa, na cha kisasa.
Amewatoa hofu wananchi kuwa zao la mtama mbali na kutumika kama chakula lakini lina soko la uhakika kwa ajili ya viwanda vya kutengeneza vinywaji hivyo hata kama mwananchi hataki kula mtama anaweza kuuza na akanunua chakula anachokitaka mwenyewe lengo likiwa kuwa na uhakika wa chakula.
Amempongeza Mkuu wa Wilaya ya Kongwa Deogratias Ndejembi kwa kuanzisha kampeni ya kuondoa njaa wilayani Kongwa (ONJAKO) na kuzitaka Wilaya nyingine kuiga mfano huo.
Awali, akielezea Kampeni ya ONJAKO Mkuu huyo wa Wilaya amesema kwenye wilaya hiyo kila kaya, pamoja na mazao mengine ni lazima kulima heka mbili (2) za mtama kwa ajili ya chakula na endapo kaya yoyote itakayokaidi muhusika atalazimika kulipa faini isiyopungua shilingi elfu hamsini (50) na endapo atashindwa basi adhabu ya kifungo cha miezi mitatu (3) itamkabili, Lengo likiwa kuhakikisha kila kaya inazalisha chakula cha kutosheleza mahitaji yake.
Kadhalika, Dk.Mahenge amemuagiza Katibu Tawala wa Mkoa Rehema Madenge kwa kushirikiana na Wakurugenzi wa Halmashauri za Wilaya Mkoani Dodoma kuhakikisha kila Wilaya ina ainisha mahitaji ya vifaa vya ujenzi wa miundombinu ya elimu ili vifaa hivyo vinunuliwe kwa mfumo wa pamoja moja kwa moja kutoka Viwandani baada ya kupata idhini ya Wizara ya Kisekta lengo likiwa kupunguza gharama za vifaa.
Amepiga marufuku tabia za viongozi na Wakuu wa Idara kwenye Wilaya kukaa tu ofisini na kuwataka waweke ratiba ya mara kwa mara ya kutembelea shule kufanya ukaguzi ili kubaini changamoto halisi zinazo kabili hali ya utoaji elimu na kuzitafutia majibu ya kudumu, pia ametaka Wilaya ziwape walimu ushirikiano unaohitajika ili waweze kutekeleza jukumu la kuwafundisha watoto kwa ufanisi zaidi.
Post a Comment