UVCCM wamlilia Gama

*UVCCM WAMLILIA LEONADIUS GAMA.*     *(NAIBU KATIBU MKUU WA UVCCM MSTAAFU  1995- 1997)*

Umoja wa Vijana wa Chama cha Mapinduzi (UVCCM) umesema umepokea kwa masikitiko, huzuni na fazaa kubwa taarifa za kifo cha aliyekuwa Mbunge wa Songea Mjini Leonadius Gama kilichotoea usiku wa  kuamkia leo katika Hospitali ya Peramiho Mkoani Ruvuma.

Katibu wa Uhamasishaji na Chipukizi UVCCM Taifa Jokate Mwegelo  amesema UVCCM imepokea kwa mshtuko  mkubwa  taarifa hiyo ya  kifo cha kada huyo Mtiifu, mwaminifu na aliyeyatumia maisha yake yote kuitumikia Jumuiya, CCM na Serikali kwa miaka kadhaa.

Amefahamisha kuwa  katika uhai wake  Gama amewahi kuwa Naibu Katibu Mkuu wa UVCCM Bara toka mwaka 1995 hadi mwaka 1997 alipoteuliwa na Rais mstaafu Benjamin Mkapa kuwa Mkuu wa Wilaya ya Newala Mkoani Lindi .

Amemtaja Gama kuwa katika uhai wake amekuwa Mjumbe wa Baraza Kuu la Taifa UVCCM na Mjumbe wa Kamati Tekelezaji Taifa, Mnec na Mkuu wa Mkoa Kilimanjaro katika serikali ya Rais mstaafu Dk Jakaya Kikwete  kabla ya kuchaguliwa kuwa mbunge wa Songea Mjini mwaka 2015.

"Tumempoteza askari mwingine muhimu wa mstari wa mbele katika safu yetu ya jeshi la chama. Mapenzi na uamuzi wa mungu hauzuiliki na amri zake hakuna wa kuzipinga "Ameeleza Jokate

Amesema UVCCM inawasihi ndugu jamaa  marafiki  na  familia ya marehemu Gama, wawe na moyo wa subira kwenye kipindi hiki kigumu cha maombolezo na msiba kwani mungu ataifanya mioyo yao kuwa yenye uvumilivu.

"UVCCM kwa umoja na udugu wetu tumestushwa mno na kifo cha kaka yetu , kada mwenzetu na kiongozi wetu hodari ambaye katika maisha yake amekuwa havunjiki moyo au kukataa tamaa katika kuhimiza na kushiriki mapambano ya kisiasa"Amesisitiza Jokate.

Bwana alitoa na Bwana ametwaa, jina la Bwana lihimidiwe.

on Saturday, November 25, 2017