JESHI LA DRA LADAI HALI YA UTULIVU IMEREJEA GOMA. WAASI WATISHIA MAISHA YA WAANDISHI WA HABARI.

 

Baadhi ya askari jeshi wa kundi la M23

JESHI la Jamhuri ya Kidemokrasia ya Congo FARDC limekiri hali ya utulivu imerejea katika Mji wa Goma baada ya kufanikiwa kuwarudisha nyuma Wapiganaji wa Kundi la Waasi la M23 ambalo lilianzisha mashambulizi yenye lengo la kuchukua eneo hilo.

Mapigano ambayo yalizuka baina ya Jeshi la FARDC na Wapiganaji wa Kundi la M23 yanatajwa kusababisha vifo vya watu mia moja na hamsini wakiwemo wapiganaji wa waasi na Afisa mmoja wa Jeshi.

Msemaji wa Jeshi la FARDC Olivier Hamuli amesema wamefanikiwa kuwafurusha wapiganaji wa Kundi la M23 na sasa hali ya utulivu imeimarishwa na amewataka wananchi kuendelea na shughuli zao.

Mapigano hayo yamezuka kipindi hiki ambacho Waziri Mkuu wa Jamhuri ya Kidemokrasia ya Congo DRC Augustin Matata Ponyo akiwa ziarani nchini Ufaransa na amekiri wanahitaji msaada wa nchi hiyo kurejesha amani huko Kinshasa.

Katika hatua nyingine Msemaji wa Kisiasa wa M23 Betrand Bisimwa amejitokeza na kukanusha madai ya wao kuwatishia maisha waandishi wa habari huko Goma.

Rwanda kupitia kwa Waziri wake wa Mambo ya Nje Louise Mushikiwabo ametoa wito wa kusitishwa kwa mapigano hayo baina ya FARDC na M23 na kuwataka waheshimu maafikiano yaliyotolewa na Jumuiya ya Nchi za Ukanda wa Maziwa Makuu ICGLR.

on Saturday, November 17, 2012