MANCINI AMTOSA TENA MARIO BALOTELLI

 

MANCHESTER, England

“Nililazimika kumtema tena nje ya kikosi baada ya kumuona hajafanya kazi ipasavyo kwa takribani siku tatu hivi. Anahitaji kufanya kazi kwa bidii. Kama mchezaji hafanyi kazi nzuri, hastahili kucheza”

MTALIANO anayeinoa Manchester City, Roberto Mancini – leo amemtosa nje ya kikosi chake kwa mara pili mfululizo mshambuliaji wake Mario Balotelli, kutokana na mtazamo hasi anaoonesha mazoezini.

Kocha huyo wa mabingwa wa England, alilazimika kumtupa nje ya kikosi Balotelli na kumtimua katika hoteli ambayo timu iliweka kambi kuelekea pambano la Jumapili iliyopita la ushindi wa 2-1 dhidi ya Spurs.

Kuelekea mechi ya jana dhidi ya Aston Villa, Mancini alisisitiza kwa kumtaka nyota huyo kuimarisha kiwango chake na utayari wake mazoezini, ikiwa anahitaji hasa kuvaa tena jezi ya Manchester City.

Mancini alisema mapema jana kuwa: “Nilimwambia baada ya mazoezi ya leo Jumamosi asubuhi kuwa, hatokuwa sehemu ya kikosi changu cha mechi ya mchana.

“Nililazimika kuchukua uamuzi huo baada ya kumuona hajafanya kazi ipasavyo kwa takribani siku tatu hivi na binafsi sipendi hilo jambo.

“Ni juu ya mtazamo wake mazoezini, nazungumzia kuhusu hilo. Anahitaji kufanya kazi kwa bidii. Kama mchezaji hafanyi kazi nzuri, hastahili kucheza.

“Unachokifanya mazoezini, ndicho utakachofanya dimbani wakati wa mechi. Hivyo kila mchezaji anapaswa kufanya kazi kwa bidii mazoezini na kuboresha kiwango chake.”

on Sunday, November 18, 2012