Miaka 49 baada ya uhuru, Kenya bado iko nyuma kimaendeleo

Na Rajab Ramah, Nairobi

Wakati Kenya ilipoadhimisha miaka 49 ya uhuru wiki iliyopita, raia waliokusanyika kwenye mitaa ya Nairobi kusherehekea walisema taifa hilo halijafikia kiwango chake kamilifu cha maendeleo na liko mbali sana kuweza kutimiza matarajio yao.

Wacheza ngoma za kijadi wa Kenya wakicheza huku wakipita mbele ya jukwaa la rais katika Uwanja wa Taifa wa Nyayo jijini Nairobi tarehe 12 Disemba wakati wa sherehe za Siku ya Jamhuri (Simon Maina/AFP).

Rais Mwai Kibaki wa Kenya, ambaye aliongoza sherehe za siku ya uhuru tarehe 12 Disemba, inayofahamika pia kama Siku ya Jamhuri, alisema kwamba ndani ya kipindi chake cha miaka 10 madarakani, ameweka misingi imara ya kuigeuza Kenya kuwa wa uchumi wa tabaka ya kati.

Katika hotuba yake kwenye Uwanja wa Taifa wa Nyayo, Kibaki alisema nchi hiyo imeimarisha kiwango cha elimu, miundombinu, maendeleo, afya, maji na usafi.

"Tulianzisha elimu ya msingi ya bure na ya lazima. Programu hii imepata mafanikio makubwa, ambapo karibuni watoto wetu milioni 10 wanafaidika nayo," alisema. "Tulishawishika kwamba kuimarisha mitandao ya usafiri kwa njia za barabara, reli na angani, na pia utanuzi wa sekta za nishati na mawasiliano, kutawezesha usafirishaji wa bidhaa na watu nchi nzima na kwenye eneo letu."

Pamoja na hayo, Mary Wangari mwenye umri wa miaka 50, mfanyabiashara wa mtaani kwenye soko la Muthurwa la Nairobi, alisema miaka mingi baada ya Kenya kupata uhuru wake kutoka Uingereza, bado umasikini, ujinga na maradhi yanaendelea kuitafuna nchi.

Hata kama kumekuwa na maendeleo fulani, alisema mengi zaidi yangeliweza kufikiwa. "Bado tunakabiliwa na matatizo yale yale ambayo tulidhamiria kuyashinda wakati wa kuzaliwa kwa nchi hii," aliiambia Sabahi. "Kwangu hakuna kilichofikiwa kustahiki hongera zangu."

Wakati nchi ikiandama kuelekea maadhimisho ya miaka 50, Wangari alisema serikali yapaswa kujenga masoko zaidi na kuunda programu za kuiinua uchumi, kama vile mikopo na misaada ya fedha kwa biashara mpya.

Alisema kutoa mikopo kwa biashara zinazoanza sasa kutawahamasisha vijana kuwa wajasiriamali. "Tabia iliyopo ni kwamba vijana wanakwenda skuli na baada ya kumaliza masomo yao wanangojea kazi za kuajiriwa na serikali kwa sababu wamezoeshwa hivyo," alisema. "Wale wanaotaka kujiajiri wenyewe na kuanzisha biashara zao, wanakosa mtaji wa kuanzia. Utamaduni wa kusubiri ajira unapaswa kubadilika sasa. Vijana wanapaswa kushajiishwa kuunda ajira zao wenyewe."

Mwanaharakati wa haki za kiraia Fredrick Odhiambo alisema bei za juu za vyakula na kupanda kwa gharama za maisha ni changamoto zinazolikabili taifa, na lazima zishughulikiwe vyema ili kuimarisha hali za maisha za watu.

"Pengo baina ya masikini na matajiri limeongezeka," Odhiambo aliiambia Sabahi. "Umasikini umetufanya kuwategemea wengine. Huu si uhuru tunaouhitaji. Tunataka ushughulikiwe kupitia uundaji wa nafasi zaidi za ajira."

Alisema kungelikuwa na usawa kwenye utumiaji wa rasilimali za taifa na uundaji wa ajira nchi nzima, ili watu kwenye maeneo wawe na fursa za kuyaboresha maisha yao.

Ndolo Benji, mwanaharakati na mwanachama wa Baraza la Katiba na Elimu, alisema katiba mpya na mageuzi yanayohusishwa nayo yameanza kuiweka nchi kwenye zama za uwajibikaji, uwazi na utawala bora.

Alisema kuyalinda mafanikio yaliyopatikana na kujenga mustakabali wa maendeleo yanayoahidiwa na mageuzi ya kikatiba, taifa lazima lishughulikie ukosefu wa usalama nchini Kenya. "Kwa maendeleo kupatikana, tunahitajika kupigania amani, hasa wakati wa uchaguzi mkuu wa hapo tarehe 4 Machi," Benji aliiambia Sabahi. "Hili linaweza kufanikiwa ikiwa tutapambana na mzuka wa ukabila na siasa za kugawana ambazo huiingiza nchi kwenye machafuko kila mwaka wa uchaguzi."

Hatua muhimu lazima zichukuliwe dhidi ya ufisadi wa serikali, alisema, ambao umepelekea kupotea kwa fedha za walipakodi ambazo zingetumiwa katika miradi ya maendeleo.

Chanzo: sabahionline.com

on Tuesday, December 18, 2012