Mwanamke mmoja mkoani Singida ahukumiwa adhabu ya miaka mitatu jela kwa kuung’ata uume wa mumewe.

 

Na Nathaniel Limu.

Mwanamke mkulima mkazi wa kijiji cha Kisana wilaya ya Iramba mkoa wa Singida Sayuni Ramadhani (42), amehukumiwa adhabu ya kutumikia jela miaka mitatu baada ya kukiri kosa la kumng’ata uume mume wake na kubakia ngozi ndogo ukatike.

Mwanaume aliyeng’atwa uume wake na mke wake ni Onesmo Nathania (42).

Mapema mwendesha mashitaka mkaguzi wa polisi Vicent Ndasa, alidai mbele ya hakimu mfawidhi wa mahakama ya wilaya ya Iramba Mrisho Mrisho, kuwa mnamo Juni 4 mwaka huu saa 12.00 jioni huko katika kijiji cha kIsana, mshitakiwa kwa makusudi aling’ata kwa nguvu uume wa mume wake Onesmo na kumsababishia maumivu makali.

Ndasa amesema siku ya tukio, wanandoa hao waliporejea nyumbani kutoka kwenye klabu ya pombe za kienyeji mali ya kijiji cha Kisana, kulitokea kutokuelewana na kupelekea waanze kugombana.

Amesema wakati wanaendelea kupigana, Onesmo alizidiwa nguvu na aliangushwa chini kisha kugandamizwa na zipu yake ya suruali iliweza kufunguliwa.

Baada ya zipu ya suruali ya Onesmo kufunguliwa, mshitakiwa alifanikiwa kuutoa uume wa mume wake kutoka ndani ya nguo ya ndani na kuutia mdomoni na kuung’ata kwa nguvu na nusura aukate vipande viwili.

Mwendesha mashitaka huyo, amesema kuwa mlalamikaji Onesmo alipiga yowe na majirani wema walifika mara moja na kumkimbiza katika zahanati ya kijiji kwa ajili ya kupatiwa matibabu.

Kabla ya kutolewa kwa hukumu hiyo, Ndasa aliiomba mahakama hiyo kumpa adhabu kali mshitakiwa ili kuwa fundisho kwake na pia kuogofya wanawake wanaotarajia kuwafanyia unyama wa aina hii ya kung’ata sehemu nyeti za waume zao.

Kwa upande wake mshitakiwa Sayuni aliiomba mahakama hiyo imwonee huruma na kumpa adhabu nafuu kwa madai kuwa hilo ni kosa lake la kwanza toka amezaliwa na vile vile ana jukumu kubwa la kushirikiana na mume wake kulea idadi kubwa ya watoto walionao.

Akisoma hukumu hiyo, hakimu mfawidhi Mrisho, alisema mahakama yake imezingatia kwa makini maombolezo ya mshitakiwa na kufikia uamuzi wa kutoa adhabu ya kutumikia jela miaka mitatu.

on Wednesday, June 12, 2013