WAKAZI WA THEMI “WAMLIMA” BARUA JOHN MONGELLA MKUU WA WILAYA ARUSHA

 

WANANCHI wa kata ya eneo la Kambarage kata ya Themi jijini Arusha wamemwandikia barua kali mkuu wa wilaya ya Arusha,John Mongella huku wakilalamikia hatua ya baadhi ya vigogo ndani ya halmashauri ya jiji la Arusha kuuza hovyo viwanja mbalimbali vikiwemo vya wazi vilivyopo ndani ya eneo lao.

Wananchi hao wamevitaja viwanja hivyo ni pamoja na kitalu nambari 10 ambacho kilitengwa kama eneo la wazi sanjari na viitalu nambari 12 na 13 ambavyo vilitengwa kwa ajili ya makazi yao.

Hatua hiyo inakuja zikiwa ni siku chache tu baada ya baadhi ya watumishi wa jiji la Arusha kudaiwa kuuza viwanja hivyo kwa kampuni mbili tofauti zinazomilikiwa na watanzania wenye asili ya kiasia(majina yao yamehifadhiwa) zilizopo mkoani Arusha.

Kwa mujibu wa taarifa zilizolifikia mtandao huu zimedai kwamba kufuatia hali ya sintofahamu wakazi hao waliamua hivi karibuni kumwandikia barua mkuu huyo wa wilaya ya Arusha huku wakimtaka aingilie kati sakata hilo.

Taarifa hizo zimedai kwamba barua hiyo iliandikwa mnamo novemba 11 mwaka huu na kisha kufikishwa moja kwa moja mbele ya ofisi ya kiongozi huyo huku ikilalamikia hatua ya baadhi ya watumishi wa jiji la Arusha kutaka kupindisha haki ya umiliki wa viwanja vyao.

Barua hiyo(Mwananchi ina nakala yake) imesema ya kwamba wakazi hao wamekuwa wakiishi kwa muda mrefu kwa hali ya wasiwasi huku ikienda mbali zaidi na kusema kuwa eneo la kitalu nambari 10 mbali na kuwa na chanzo cha maji limemilikishwa kwa mtu binafsi.

“Kitalu nambari 10 yahusu chemchem ya mto Themi ilitakiwa iachwe wazi na eneo la chemchem lihifadhiwe na wananchi walioko vitalu nambari 12 na 13 walihifadhi kwa kupanda miti na kuiboresha chemchem ikae katika hali ya usalama siyo imilikishwe kwa mtu binafsi”ilisema sehemu ya barua hiyo

Hatahivyo,barua hiyo ilienda mbali zaidi na kumtaka mkuu huyo wa wilaya kuupatia ufumbuzi wa haraka mgogoro huo kwa kuwa una hatarisha usalama wa maisha yao kadri ya siku hadi siku.

Mongella,alipofuatwa na waandishi wa habari ofisini kwake alikiri wakazi hao kufikisha malalamiko yao ofisini kwake hivi karibuni huku akisisitiza kwamba aliwapa maelekezo ya kuwasilisha malalamiko yao kwa utaratibu unaotakiwa.

Hatahivyo,mkuu huyo wa wilaya alisema kwamba amejiandaa kufanya ziara ya kutembelea maeneo yote yenye mgogoro ili kushuhudia ukweli huku akihaidi kuyapatia ufumbuzi matatizo hayo .

on Thursday, November 15, 2012