WASOMI WATAKIWA KUJITOKEZA KATIKA MIKUTANO YA MAONI YA KATIBA MPYA

 

DARE SALAAM, Tanzania

KATIBU wa Mkoa (CCM), wa Vyuo vya Elimu ya Juu, Christopher Ngubiagai amewataka vijana wasomi wa mkoa huo wa Kichama, kujitokeza kwa wingi kwenye mikutano inayoendelea katika Mkoa wa Dar es Salaam, ya kutoa maoni kwa ajili ya upatikanaji wa Katiba Mpya ya Tanzania.

Akizungumza na waandishi wa habari jijini Dar es Salaam leo, Katibu huyo, amesema kuwa wasomi wana nafasi nzuri katika kuchangia maoni yao bora ambayo yatasaidia kupatikana kwa Katiba itakayolenga kulinda maslahi ya Watanzania kwa ujumla.

Ngubiagai amesema maoni ya wasomi yanahitajika katika mchakato huo wa upatikanaji wa Katiba Mpya si vyema kwa vijana hao kujiweka pembeni huku wakitoa nafasi kwa watu wanye nia mbaya kupandikiza maoni yao, kwa maslahi binafsi.

"Tunataka Katiba itakayosimamia rasilimali, ardhi ya nchi hii, kulinda haki za makundi ya kijamii hasa kila kijana pamoja na kudumisha amani na utulivu, udugu na ujamaa,''alisema.

Ngubiagai alisema kila kijana ana uwezo wa kupambanua mambo, hivyo ni vema wakatumia uwepo wa wajumbe wa Tume ya Mabadiliko ya Katiba ndani ya Mkoa huo Dar es Salaam, kutoa maoni yao, vijana hao wasomi wanapaswa kutumia muda huo vizuri.

Kutokana na hali hiyo, Katibu huyo aliwataka viongozi wa matawi yaliyopo ndani ya taasisi ya vyuo vikuu nchini kuhakikisha wanafahamu vizuri maudhui ya Katiba ya Jamhuri ya Muungano iliyopo sasa ili waweze kuwa na wigo mpana wa uchangiaji katika kutoa maoni yao.

on Thursday, November 22, 2012