CRDB YASHINDA TUZO 3 ZA MWAJIRI BORA WA MWAKA 2012

 

Waziri wa Kazi na Ajira, Gaudencia Kabaka (kushoto), akimkabidhi kombe, Naibu Mkurugenzi Mtendaji Huduma Shirikishi katika Benki ya CRDB, Esther Kitoka, baada ya benki hiyo kushika nafasi ya pili, katika hafla ya utopaji tuzo za Mwajiri Bora Tanzania 2012 zilizofanyika jijini Dar es Salaam. (Picha na Habari Mseto Blog)

Baadhi ya maofisa wa CRDB wakiwa katika hafla utoaji wa tuzo za Mwajiri Bora wa Mwaka 2012

Baadhi ya maofisa wa benki ya CRDB wakiwa na tuzo tatu walizoshinda katika hafla ya utoaji wa tuzo za Mwajiri Bora.

Naibu Mkurugenzi Mtendaji Huduma Shirikishi katika Benki ya CRDB, Esther Kitoka

DAR ES SALAAM, Tanzania

BENKI ya CRDB imejishindia tuzo tatu ikiwamo ya Fedha kwa kushika nafasi ya pili katika kinyang’anyiro cha Tuzo za Mwajiri Bora wa Mwaka 2012, zilizohusisha zaidi ya Kampuni 30, ambayo ilipokelewa na Naibu Mkurugenzi Mtendaji Huduma Shirikishi wa benki hiyo Esther Kitoka.

Hafla ya kukabidhi tuzo hizo zilizoandaliwa na Chama cha Waajiri nchini Tanzania (ATE) , ilifanyika kwenye Ukumbi wa Mlimani City jijini Dar es Salaam, ambapo Rais Jakaya Kikwete alikuwa mgeni rasmi.

Akiongea wakati wa kukabidhi tuzo hizo, Rais Kikwete, aliwashukuru waajiri Wakitanzania, mashirika ya umma na binafsi kwa kazi nzuri waliyoifanya katika kuisadia Serikali kutengeneza ajira na maendeleo ya uchumi na pia alikiri uwepo wa tatizo la ajira hapa nchini.

“Ninayo furaha kushiriki nanyi jioni ya leo. Mmekuwa msaada mkubwa kwa taifa letu na ninapenda kuwaahidi kuwa Serikali itawasaidia katika shughuli zenu,” alisema Rais Kikwete.

Aidha Rais Kikwete aliongeza kuwa, juhudi za Serikali pekee haziwezi kuifanya nchi ya Tanzania kuwa yenye kipato cha kati labda kama kutakuwa na juhudi kati ya Serikali na sekta binafsi ambazo zitasaidia kupunguza idadi ya Watanzania wasio na ajira nchini.

Rais Kikwete ametoa changamoto kwa Chama cha Waajiri Tanzania (ATE) na Serikali kufanya kazi kwa pamoja katika masuala mawili muhimu ambayo ni maendeleo ya rasilimali watu hasa katika uendelezaji wa ushirikiano wa maendeleo kati ya taasisi za vyuo vya juu na viwanda.

on Thursday, December 13, 2012