Hoteli ya Double Tree yafunguliwa

 

HATIMAYE huduma katika Hoteli ya Double Tree Hilton ya jijini Dar es Salaam zimerejea baada ya maofisa wa Baraza la Uhifadhi na Usimamizi wa Mazingira (NEMC) kuridhika na marekebisho yaliyofanyika, hivyo kuifungulia.

Mkurugenzi wa Mauzo, Florenso Kirambata, alisema kuwa shughuli zimerejea kikamilifu kuanzia Desemba 22, mwaka huu, baada ya maelekezo kutekelezwa.

“Uongozi wa hoteli unapenda kutoa shukrani za dhati kwa Waziri wa Nchi, Ofisi ya Makamu wa Rais (Mazingira), Dk. Terezya Huvisa, pamoja na maofisa wa NEMC kwa ushirikiano mzuri uliotuwezesha kutimiza maelekezo yote na hivyo kurejesha huduma katika hoteli yetu,” alisema.

Kirambata alifafanua kuwa, bomba dogo lililokuwa linatiririsha maji baharini awali limekwisha kuzibwa, ambapo NEMC imeridhia marekebisho yaliyofanyika na kuwaondolea zuio.

“Nawashukuru wateja wetu wote na wadau wengine kwa uvumilivu wao wakati wote wa kipindi cha mpito, na tunawaahidi kuendelea kuboresha huduma zetu kuifanya hoteli yetu mahali pazuri kwa wageni,” alisema Kirambata.

Mwanzoni mwa juma lililopita, Waziri Huvisa alitoa amri ya kufungwa kwa hoteli hiyo kufuatia ukiukwaji wa taratibu za utunzaji bora wa mazingira.

Hata hivyo, uongozi wa hoteli ulikiri kosa na kufanya marekebisho haraka na kueleza kwamba kwa kawaida magari ya maji machafu huchukua maji hayo na kuyapeleka kunakohusika.

Naye Naibu Waziri wa Mazingira, Charles Kitwanga, amethibitisha kuruhusiwa kwa hoteli hiyo kurejesha huduma zake kama kawaida baada ya kufanya marekebisho stahiki.

on Thursday, December 27, 2012