MAONESHO YA 13 YA NGUVU KAZI/JUA KALI YAFUNGULIWA RASMI

Balozi wa Tanzania nchini Burundi, Dkt. James Nzagi akitoa salamu kwa niaba ya Serikali ya Jamhuri ya Muungano wa Tanzania katika sherehe za ufunguzi rasmi wa maonesho ya 13 ya Nguvu Kazi/Jua kali katika viwanja vya Musee Vivant mjini Bujumbura Burundi tarehe 5/12/2012.

Mary Mwakapenda,

Afisa Habari, Wizara ya Kazi na Ajira

Makamo Spika wa Bunge la Jamhuri ya Burundi, Mhe. Jean Kabura akikata utepe kufungua rasmi maonesho ya 13 ya Nguvu Kazi/Jua kali katika viwanja vya Musee Vivant mjini Bujumbura Burundi tarehe 5/12/201.

Maonyesho ya 13 ya Nguvu kazi/Jua kali yamefunguliwa rasmi leo katika uwanja wa Musee Vivant mjini Bujumbura Burundi.

Akifungua maonesho hayo kwa niaba ya Rais wa Jamhuri ya Burundi, Mhe. Pierre Nkurunziza, Makamo Spika wa Bunge la Burundi, Mhe.Jean Kabura amesema maonesho haya huandaliwa kwa ajili ya kuendeleza shughuli za sekta binafsi na kuongeza ajira kwa wajasiriamali.

Mhe. Kabura amesema kwamba maonesho haya yanaendana na sera ya Afrika Mashariki ya kuendeleza viwanda ambayo ilipitishwa na Wakuu wa Nchi Wanachama katika mkutano wao wa kilele mwaka 2011 mjini Bujumbura, Burundi.

Aidha ameongeza kuwa maonesho haya yatawasaidia vijana kujikita katika sekta isiyo rasmi ili kuongeza ajira kwa vijana na kupunguza na hatimaye kuondoa kabisa umaskini wa kipato.

Amewaomba wafadhili kuangalia bidhaa za wajasiriamali ili kutafuta njia za kuwasaidia kuongeza ubora wa bidhaa hizo na kuwatafutia masoko.

Mhe. Kabura amewashukuru waandaji wa maonesho kwa maandalizi mazuri na kuweza kufanikisha shughuli nzima ya uzinduzi.

Akitoa salam kwa niaba ya Serikali ya Jamhuri ya Muungano wa Tanzania, Balozi wa Tanzania nchini Burundi, Dkt. James Nzagi ameishukuru Serikali ya Jamhuri ya Burundi kwa maandalizi mazuri ya maonesho na kwa mapokezi mazuri kwa washiriki wote waliofika Bujumbura.

Aidha amewashukuru watumishi wa mipakani kwa ushirikiano waliouonesha kwa wajasiriamali wa Tanzania kupita kwa usalama na mali zao bila kusumbulia na kusema kuwa hii in ishara ya kuonesha ushirikiano ulio imara katika nchi wanachama wa Jumuiya ya Afrika Mashariki.

Dkt. Nzagi amesema kuwa Serikali ya Jamhuri ya Muungano wa Tanzania inayachukulia maonesho haya kama njia ya kubadilisha Tanzania kuwa taifa la uchumi wa kati na unaoendeshwa na viwanda.

Ameongeza kuwa kwa kuzingatia umuhimu wake kwa watanzania, Serikali imeendelea kuwasaidia wajasiriamali wa sekta isiyo rasmi kuweza kushiriki maonesho haya ili kukuza shughuli zao na kuimarisha ajira zao.

Katika maonesho haya, Tanzania ilipewa nafasi 185 za wajasiriamali kushiriki. Wajasiriamali 87 ndio walioweza kushiriki wakiwa na bidhaa mbalimbali ambazo ni pamoja na nguo za batiki, vyakula vya kusindika, bidhaa za ngozi, dawa za asili, dagaa wa kukaushwa, mafuta ya ubuyu, vikapu vya kushona n.k.

Maonesho ya 13 ya Nguvu Kazi/Jua Kali ya Afrika Mashariki hufanyika kila mwaka kwa mzunguko katika kila Nchi wanachama wa Jumuiya ya Afrika Mashariki baada ya kufunguliwa rasmi mwezi Novemba, 1999 mjini Arusha Tanzania. Maonyesho hayo kwa mwaka huu yanafanyika nchini Burundi ikiwa ni mara ya kwanza maonesho haya kufanyika nchini humo.

Maonesho hayo yana lengo la kukutanisha wajasiliamali wadogo kwa ajili ya kubadirisha uzoefu, kuwajengea mtandao wa kibishara, kukuza vipaji vyao pamoja na teknolojia.

on Friday, December 7, 2012