Mpira wa miguu Tanzania wapata ufadhili kutoka Mfuko wa Taifa wa Hifadhi ya Jamii

 

Usaili na Deodatus Balile, Dar es Salaam

Ramadhan Dau, mkurugenzi mkuu wa Mfuko wa Taifa wa Hifadhi ya Jamii (NSSF), alisema mfuko huo utawekeza shilingi milioni 500 (dola 32,000) katika mpira wa miguu mwaka ujao.

Mkurugenzi Mkuu wa Mfuko wa Taifa wa Hifadhi ya Jamii Ramadhan Dau akihutubia wahariri katika hoteli ya Sea Cliff huko Zanzibar tarehe 3 Disemba, 2012. [Deodatus Balile/Sabahi]

Dau alisema kampuni hii ya dola, ambayo inasimamia pensheni za wafanyakazi wa Tanzania, mwanzoni iliwekeza katika soko la mali isiyohamishika ili kuendeleza mtiririko wake wa fedha, lakini kufuatia tathmini yakinifu ya hivi karibuni bodi ya kusimamia shughuli za utawala iliamua badala yake kuwekeza katika mpira wa miguu.

Uwekezaji wa mwaka ujao utakua wa kuanzia wa kile ambacho Dau aliita chombo cha uwekezaji wa muda mrefu kwa NSSF ambacho kitasaidia kutoa ajira na mapato kwa wachangiaji wa mfuko

Dau, mhadhiri wa Chuo Kikuu cha Dar es Salaam na aliyejieleza kuwa shabiki wa mpira wa miguu, alikaa pamoja na Sabahi kujadili ni kwa nini NSSF iliona ni lazima kuwekeza katika mpira wa miguu na ni kwa namna gani inapanga kufanya mradi huo kuwa wa faida kwa wachangiaji.

Sabahi: Watanzania wanapenda mpira wa miguu, lakini nchi imeendelea kuwa na hali duni katika mashindano ya kimataifa. Nini kitafanyika kuinua viwango vya mpira wa miguu?

Ramadhan Dau: Tunao vijana wenye afya na vipaji. Mpira wa miguu ni mchezo wa kwanza katika nchi kwa idadi ya mashabiki. Mashabiki wako tayari kuchangia fedha za kiingilio hata kwa matokeo mabaya. Nilishangaa ni nini tunachokikosa kama nchi na jibu liko wazi. Tunakosa usimamizi imara wa mpira wa miguu.

Sabahi: Ni nini ambacho NSSF inapanga kufanya kuhusiana na hilo?

Dau: Katika mkutano wa mwisho wa bodi ya NSSF [uliofanyika mwezi Disemba], tulikubaliana kwamba hatuwezi kuendelea kubakia kuwa watazamaji. Kama shirika lililopo la kujenga matumaini, tuliamua kuwekeza kwa kiwango kikubwa katika mpira wa miguu. Tumetenga shilingi za Kitanzania milioni 500 (dola 32,000) katika bajeti ya 2013 kuwekeza katika mpira wa miguu.

Mwezi Oktoba uliopita, nilisafiri kwenda Manchester nchini Uingereza kuweka mipango kwa ajili ya jambo hili. Tunataka kuingia katika mkataba na timu zenye viwango katika dunia ili kunufaika na msaada wao wa kiufundi katika jitihada zetu za kuhuisha mpira wa miguu Tanzania.

Kwa kuanzia, tutaandikisha watoto [wenye umri wa miaka 7 hadi13]. Watapewa mafunzo yenye viwango ambayo yatajumuisha mafunzo ya kimwili na kisaikolojia yakilenga kuwafanya kuwa wachezaji wazuri wa mpira wa miguu. Tutaajiri madaktari kuwahudumia na kutoa mlo kamili kudumisha afya imara. Vijana hawa, wachezaji wenye vipaji watakwenda shule asubuhi na kurudi [katika kambi] jioni kwa mafunzo ya mpira wa miguu.

Sabahi: Uliposafiri kwenda Uingereza ulipata mwitiko gani kwa watu wa kule?

Dau: Majibu yao yalikuwa mazuri sana. Nilikutana na [meneja wa Manchester United] Sir Alex Ferguson ambaye alivutiwa sana na mpango huu. Kadri itakavyoendelea, ushirikiano wao [na timu za kimataifa] utaendelea kupanuka zaidi kuliko [kutoa msaada wa kiufundi]. NSSF itawalea wachezaji hawa vijana hadi umri wa mika 15 na 17, kisha [itawasaidia kutafuta mikataba na] vilabu vikubwa kutoka Ulaya au katika nchi nyingine zinazowataka duniani.

Nilikuwa nimesema kwamba tatizo kubwa kwa mpira wetu wa miguu ni usimamizi. Tunataka kuondoa tatizo hilo. Baada ya kuwachagua vijana wadogo [wenye vipaji], tutaingia nao mkataba [kwa kupata idhini] ya wazazi wao.

Tutawalipa mishahara ya kila mwezi na fedha hizo zitakwenda moja kwa moja katika akaunti zao binafsi za benki. Fedha hizo zitakuwepo [kwa matumizi yao binafsi] wakati NSSF italipia gharama za kujikimu na ada ya shule wakati wote wa kipindi cha mkataba.

Mkataba utaiwezesha NSSF kurejesha gharama za kuwekeza pale mchezaji anapouzwa nchi za nje. Hii ina maana tutatoa wachezaji bora wenye uwezo wa kurejesha malipo ya gharama zilizotumika kuwekeza. Kwa mfano, kama tutatumia kiasi cha dola milioni 1 hadi milioni 3 kwa kipindi cha miaka tano hadi nane kumpa mafunzo mchezaji, na kuweza kumuuza mchezaji kwenye vilabu vyenye hadhi duniani kwa kiasi kama cha dola milioni 8, hii ina maana tutarejesha gharama na kugawana faida. Kwa namna hiyo tutadumisha mradi huo.

Sabahi: Hatua inayofuatia katika mpango ni ipi?

Dau: Dira ni kujenga chuo cha mpira wa miguu, lakini hatutaki kusubiri. Mwanzoni mwa mwaka ujao, tutakodi jengo na kulifanya kuwa [bweni]. Wachezaji hao vijana wenye vipaji wataendelea kwenda shule katika shule za umma wakati tunakamilisha mchakato wa kujenga chuo katika vitongoji vya Dar es Salaam.

Sabahi: Mtaajiri wachezaji wangapi na vigezo vitakuwa ni vipi?

Dau: Tumepanga bajeti ya wachezaji 50 kwa mwaka 2013. Lakini kadri tunavyoendelea, idadi itaongezeka kufikia kiasi cha 300. Hiyo ndiyo shabaha yetu katika miaka kumi ijayo. Tutatumia mashindano baina ya shule [kuchagua wanafunzi]. Kutoka shule ya awali, tutaanza kutambua vipaji vya wanafunzi nchi nzima na kuviendeleza.

Sabahi: Suala hilo litainufaishaje nchi na kusaidia kuboresha mpira wa miguu?

Dau: Hilo liko wazi. Kwanza kabisa, [ NSSF] itakuwa na klabu ya mpira wa miguu ambayo itashiriki katika ligi yetu kuu ya taifa. Kwa kuwa na wachezaji waliyomotishwa ambao wamepata mafunzo mazuri na wanaolipwa vizuri, nina uhakika watainua kiwango cha ligi kuu.

Sabahi: Mwezi Disemba, FIFA, shirika la kimataifa ambalo linasimamia mpira wa miguu na kuandaa Kombe la Dunia, liliiweka Tanzania katika nafasi ya 130 kati ya wanachama 207. Tanzania itafikia nafasi ya ngapi kwa uwekezaji wa NSSF?

Dau: Lengo letu la kwanza ni kuwa nafasi 50 bora. [Baada ya hapo], tutajitahidi kuwa katika nchi 30 bora na kuendelea kupanda juu, tukidhamiria namba moja. Sioni ni kwa nini tusiweze.

Sabahi: Lengo kubwa zaidi la NSSF katika programu hii ni lipi?

Dau: Ushiriki wetu wa kwanza na pekee katika Kombe la Mataifa ya Afrika ilikuwa mwaka 1980. Hatujawahi kamwe kushiriki katika Kombe la Dunia kama nchi. Sasa tunapaswa kufika huko. Tumesubiri kwa muda mrefu na NSSF inaahidi kubadilisha hali hii isiyokubalika.

on Wednesday, January 2, 2013