DSTV YAZITEMA SIMBA NA YANGA

Kampuni ya DSTV imesema haitaonyesha mechi za Simba na Yanga baada ya kutofikia makubaliano na Shirikisho la Soka Tanzania TFF.

Kauli ya DSTV imekuja baada ya kuwepo na maswali mengi juu ya kuonyeshwa live kwa mechi za Ligi Kuu na kituo hicho ambapo wameonekana kushikwa na kigugumizi kwa madai kwa sasa hawana makubaliano yoyote na TFF kwa sababu ambazo wamekiri zipo nje ya uwezo wao.

Akizungumza jana na waandishi wa habari Meneja Masoko wa kampuni hiyo Ronald Shelukindo alisema kuwa awali waliweza kuonyesha mechi hizo kutokana na kuwa na mawasiliano mazuri na TFF, lakini kwa sasa hawana makubaliano yoyote ambayo amedai hawezi kuyaweka hadharani kwa sasa.

“Ni kweli kuna baadhi ya mechi za Ligi Kuu za hapa nyumbani tulikuwa tunaweza kuzionyesha, kutokana na makubalino miongoni mwetu na TFF lakini kwa sasa hatuwezi kufanya hivyo kwa sababu zilizo nje ya uwezo wetu ambazo hatuwezi kuzielezea kwa sasa,” alisema Shelukindo.

Aidha, Shelukindo alisema katika hatua nyingine katika msimu mpya wa soka wataanza kuonyesha mechi mbalimbali za Ligi ya Uingereza na nyinginezo kwa miaka mitatu mfululizo.

Alisema wakati ligi mbalimbali za Ulaya zikitaraji kuanza mapema mwezi huu amewataka wateja wao kulipia huduma hiyo ili waweze kufuatilia kwa ukaribu mechi hizo huku wakiweka punguzo la asilimia kumi kwa wateja watakaolipia bili zao kabla ya kuisha kwa za awali.

Tayari kampuni ya Azam tv imeingia mkataba na klabu 13 za ligi kuu Tanzania bara kwa ajili ya kuonyeshwa live katika msimu ujao wa ligi hiyo inayotaraji kuanza mapema mwezi huu. MWANANCHI

on Thursday, August 8, 2013