Tuwajenge watoto wetu kuwa ’ watu wa vitabu’

          

Madhumuni makubwa ya maisha ya mwanadamu ni kufanya juhudi za kutafuta namna ya kuyaelewa mazingira yake na hivyo kupiga hatua za maendeleo. Juhudi hizo za mwanadamu ndicho chenye kujulikana kama ' Elimu'. Naam, mwanadamu anapaswa aitafute elimu, na hivyo basi, maarifa.

********

Shule yaweza kutafsiriwa kuwa ni ' maabara' ambamo hutengenezwa ' chanjo' ya maradhi ya kimaisha kwa mwanadamu. Wale wenye maarifa na busara za kuandaa ' chanjo' hiyo ndiyo wanaoitwa walimu.

Maana, shule ni mahali pa kujifunzia, ambapo yote yenye kuhusiana na maisha ya sasa na hata yajayo hufundishwa. Ni mahali ambapo hupatikana tafsiri za vitu na matukio katika jamii. Ni mahali ambapo, mbali ya mambo mengine, mwanafunzi anapaswa kusaidiwa kupata maarifa ya kujitambua na kuyatambua mazingira anamoishi.

Tunaweza kabisa kusema, kuwa shule ni mahali pa ' ibada' na ' viongozi watakatifu' wenye kupaswa kuongoza ' ibada' hizo ni Walimu.

Hata hivyo, kinachofanyika shuleni hakiwezi kuachwa tu kwa mwalimu. Mzazi ana nafasi kubwa ya kumjenga mtoto wake aje kuwa mtu wa vitabu. Hakika, maarifa mengi yanapatikana vitabuni. Binafsi naamini, kuwa moja ya uamuzi mzuri niliyopata kuyafanya ni hili la kutojihusisha na siasa za majukwaani ili kuwa na muda zaidi na watoto wangu.

Hakika, miaka kumi ya mwanzo ya makuzi ya mtoto ni muda muhimu sana katika makuzi yake. Hapo ndipo unajengwa msingi wa mtoto maishani.

Mzazi unatakiwa kuwa karibu na mtoto katika miaka yake kumi ya mwanzo, lakini, hata baada ya hapo, kabla mtoto hajatimiza miaka kumi na minane, bado mzazi unatakiwa kuwa karibu na mtoto wako. Kujenga misingi ya uhusiano wa mtoto na mzazi, awe mzazi wa kike au kiume.

Mara nyingi tumefanya makosa kudhani kuwa uhusiano yanayopaswa kujengwa ni kati ya watu wazima. Kati ya mke na mume na kati ya mzazi na wazazi wengine. Tunayasahau uhusiano kati ya mtoto na mzazi.

Tunafanya makosa kuwaachia yaya wa nyumbani jukumu la kulea watoto wetu. Tunafanya makosa pia, kuwaachia walimu tu, jukumu la kufuatilia mienendo ya elimu ya watoto wetu.

Wazazi wa kiume tumekuwa mfano mbaya sana wa kuliacha jukumu la kulea kwa mzazi wa kike.

Hakika, mtoto, awe wa kike au kiume, anahitaji sana kuwa karibu na mzazi wa kiume pia. Kuwa na uhusiano ya kirafiki pia. Kazi ya mzazi haipaswi kuwa ni ya kukaripia watoto tu, bali kuwa rafiki nao, kuwa na muda wa kucheka nao. Kubwa zaidi, uwa tayari kujifunza kutoka kwa watoto.

Mtoto anaweza kuwa mwalimu mzuri kwa mzazi, kama mzazi atamwandalia mtoto mazingira ya kuifanya kazi ya ualimu kwa mzazi wake.

Niwe mkweli, kuwa nimejifunza mengi kutoka kwa watoto wangu kama wao wanavyojifunza kutoka kwangu.

Nilipata kumkuta mtoto wangu akisoma kitabu . Nikamwomba anisimulie kidogo juu ya anachosoma. Alipoanza kunisimulia, basi, nilijikuta nataka kumsikiliza zaidi. Kinahusu mtoto ambaye wazazi wake walitengana. Mzazi mmoja anaishi Marekani na mwingine Canada.

Mtoto huyu aliondoka kwa mama yake Marekani ili aende kumwona baba yake Canada. Alipanda ndege ndogo. Alikuwa yeye na rubani tu.

Huko angani rubani akapatwa na mshtuko wa moyo. Mtoto huyu akalazamika kuongoza ndege hiyo. Aliongoza huku ndege ikipotea angani. Mwisho ndege ikaishiwa mafuta, maana hakujua hasa namna ya kuongoza ndege.

Ndege ikaanguka ziwani. Bahati njema mtoto aliweza kuogelea na kunusurika. Akalikuta pango, hapo akaanza kutafuta mbinu za kuishi akisubiri msaada wa kuokolewa... Kisa kinaendelea..!

Tunajifunza nini?

Umuhimu wa wazazi kuwajengea watoto wetu utamaduni wa kujisomea. Mimi niliwasomea vitabu watoto wangu tangu wangali wadogo sana. Hivyo, nikawajengea hamu ya kusoma.

Si ajabu, kuwa leo wanasoma vitabu kiasi cha hata kuweza kunisimulia ya kwenye vitabu ambavyo nisingeweza kuviona maishani mwangu. Kuna ninayojifunza. Hivyo, watoto wangu wanakuwa walimu wangu pia.

Naam, mtoto wako ni mwalimu wako pia, hivyo, ili awe mwalimu mzuri zaidi, tunapaswa kumjenga aje kuwa mtu wa vitabu.

Nahitimisha.

chanzo:mwananchi

on Monday, August 19, 2013