WANAODAIWA KUWA AL-SHAABAB WATOLEWA 'NDUKI' HUKO MAPANGO YA AMBONI TANGA

Habari za uhakika kutoka chanzo chetu huko Mkoani Tanga, zinasema kuwa Askari Polisi kwa kushirikiana na Jeshi la Wananchi JWTZ, wamefanikiwa kuwadhibiti watu wanaodaiwa kuwa ni miongoni mwa watu wanaounda kundi la Al-shaabab waliokuwa wamejificha kwenye mapango ya Amboni huko mkoani Tanga.

Aidha imeelezwa kuwa taarifa ziliwafikia Polisi wa mkoa huo ambao nao pia waliomba kuongezewa nguvu kutoka Jijini Dar es Salaam, jana majira ya saa nane mchana ambapo Helkopta ya Polisi iliondoka jijini Dar ikiwa imesheheni askari wenye zana kamili na kulizunguka Pango la Amboni na kufanikiwa kuwashambulia.

Watu hao walionekana kuwa wakaidi ambapo walianza kujibizana risasi na askari Polisi hadi walipozidiwa na kuanza kutimua mbio wakielekea mpakani mwa Nche ya Kenya, huku milio ya risasi ikisikika kutawala mapangoni humo kwa muda mrefu hadi majira ya saa sita usiku wa jana.

Askari wetu waliongeza nguvu kwa kuwashambulia kupitia anga kwa Helkopta huku, Magari kadhaa ya Polisi nayo yakishambulia pembezoni mwa Mapango hayo na kuwazidi nguvu ambapo hadi muda huu inasemekena kuwa bado askari wapo eneo la tukio wakiendelea kuhakikisha usalama na kusafisha kabisa harufu ya Al-Shaabab hao.

Imeelezwa kuwa mwanzo wa Movie hili lilianza baada ya kukamatwa mtu mmoja aliyehisiwa kuwa ni Al-Shaabab mkoani humo na baada ya kuteswa na kusulubiwa aliamua kutaja kuwa hakuwa peke yake na kuwaongoza askari hao hadi kwenye Mapango hayo na kuonyesha walipo wenzake, ambapo pia alikiri kuwa ni miongoni mwa waratibu na waliowahi kufanya matukio kadhaa ya uporaji wa silaha kwenye Vituo vya Polisi. 

credit: Mafotoweb

on Saturday, February 14, 2015