Kamanda wa jeshi la polisi mkoa wa Singida, ACP Linus Sinzumwa akitoa taarifa ya matukio mbalimbali ikiwemo la mama mzazi kumuuawa mtoto wake mwenye umri wa mwezi moja na nusu kwa waandishi wa habari (hawapo kwenye picha).
Afisa upelelezi wa makosa ya jinai (RCO) mkoa wa Singida, Thobias Sedoyeka (wa kwanza kulia) akifuatilia taarifa ya mauaji iliyokuwa ikitolewa na kamanda wa polisi mkoa wa Singida,Linus Sinzumwa (hayupo pichani).
Askari Kanzu akiwa anampeleka kijana anayedaiwakuwa ni kibaka anayetuhumiwa kuiba simu ya kinganjani katika duka lililopo mtaa wa Utemini mjini Singida. Mfuko alioushikila una simu anayodaiwa kuiba.(Picha zote na Nathaniel Limu).

Na Nathaniel Limu wa Mo Blog
Watu wanne mkoani Singida wamefariki dunia katika matukio tofauti likiwemo la mtoto mmoja mwenye umri wa mwezi moja kuuawa na mama yake mzazi kwa kukatwa katwa kwa panga kichwani.
Akizungumza na waandishi wa habari ofisini kwake Kamanda wa polisi mkoa wa Singida ACP Linus Sinzumwa, amesema mtoto Halawa Msika mkazi wa kijiji cha Lugongo kata na tarafa ya Ibaga, aliuawa na mama yake mzazi Njile Makelemo (40) kwa kumkatakata kichwani kwa panga na kusababisha kifo chake papo hapo.
Amesema tukio hilo la kusikitisha limetokea Aprili mosi mwaka huu saa tatu usiku huko katika kijiji cha Lugongo wilaya mpya ya Mkalama.
Sinzumwa amesema pia mama huyo anayedaiwa kuwa na matatizo ya akili, aliwajeruhi watoto wake wengine Jandika Msika (2) na Hoga Msika (17) wote kwa kuwakatwa panga katika mikono yao yote miwili.
Kamanda huyo amesema hivi sasa watoto hao wawili wamelazwa katika hospitali ya misheni Iyambi na hali zao sio nzuri.
Amesema upelelezi wa awali umebaini kwamba mtuhumiwa huyo ana matatizo ya akili na tayari ameisha kamatwa na anatarajiwa kufikishwa mahakamani wakati wowote upelelezi utakapo kamilika.
Katika tukio la pili, Kamanda Sinzumwa amesema kuwa Juma Rashidi Mkua (60), Johari Lazaro (45) na Amina Rashid mwenye umri wa mwaka moja na nusu, wote wa familia moja wamefariki dunia baada ya kuangukiwa na ukuta wa nyumba yao ya tembe.
Amesema familia hiyo imefariki dunia Aprili mosi mwaka huu usiku wa manane wakati wamelala kwenye nyumba yao ya tembe.