Wajane wa wafanyakazi Tazara wavamia NSSF Dar kwa maandamano

Wajane na wasimamizi wa mirathi zaidi ya 40 wa waliokuwa wafanyakazi wa Mamlaka ya Reli ya Tanzania na Zambia (Tazara) kutoka Mkoa wa Mbeya, jana waliandamana katika makao makuu ya Shirika la Taifa la Hifadhi ya Jamii (NSSF) kudai malipo ya mirathi. Wajane hao walionekana wakiwa wamefurika katika  ofisi za makao makuu ya NSSF zilizopo jengo la Benjamini Mkapa Tower eneo la Posta, jijini Dar  es Salaam.  Kuwasili kwa wajane hao kulileta taharuki kwa wafanyakazi wa NSSF makao makuu kutokana na idadi yao kuwa kubwa hasa ikizingatiwa hakukuwa na taarifa za ujio wao.

Wakizungumza na NIPASHE nje ya ofisi za NSSF zilizopo ghorofa ya 10 katika jengo hilo, walisema wamewasili Dar es Salaam saa 10:20 alfajiri kwa treni ya Tazara kutoka Mbeya baada ya kuelezwa kuwa malipo yao yameiva NSSF makao makuu.

Mkuu wa msafara huo, John Kalinga, alisema hatua ya kwenda Dar es Salaam kufuata malipo ya mirathi, imetokana baada ya kuelezwa na viongozi wao pamoja na wafanyakazi wa NSSF Mbeya kuwa malipo hayo yatalipwa huko.

Alisema katika hali ya kushangaza baada ya kuwasili katika ofisi hizo walielezwa kuwa wamedanganywa kwa kuambiwa kuwa malipo yao yatalipwa Dar es Salaam.

Kalinga alisema waliamua kufuatilia malipo yao baada ya kubaini malipo waliyopewa awali hayakuwa na mchango wa asilimia 10 unaotakiwa kuchangwa na mwajiri katika makato ya mshahara kama sheria na taratibu zinavyoeleza.

Kutokana na hali hiyo, Meneja Malipo wa NSSF, ambaye alikataa kutaja jina lake aliwaeleza wajane na wasimamizi hao wa mirathi kuwa wanatakiwa kurudi kwa mwajiri wao akawaandikie malipo, ambayo hawakulipwa kwa kila mmoja na kuwasilisha NSSF.

Ofisa Uhusiano wa NSSF, Eunice Chiume (Chiume), alipotafutwa kwa simu yake ilikuwa ikiita bila kupokelewa, badala yake alituma ujumbe kwamba, muda huo hawezi kuongea na kumtaka mwandishi kutuma ujumbe mfupi wa simu na alipotumiwa swali hakujibu tena.

Meneja mafao wa NSSF, Oigo James, akizungumza na NIPASHE jana alisema baada ya wajane na wasimamizi hao kuwasili wamebaini waliowasili ni wale, ambao ndugu zao walifariki wakiwa kazini na siyo wastaafu.

James alisema wafanyakazi wa Tazara, ambao walifariki wakiwa kazini wote walishalipwa mafao yao muda mrefu kupitia ofisi ya NSSF Mbeya na hivyo hakutakuwa na malipo ya ziada.

Hata hivyo, alisema amewashauri wakaonane na mwajiri wao ili kama kuna malipo, ambayo mwajiri hakuyaweka katika malipo yaliyofanyika awali awaandikie katika barua ili NSSF iangalie utaratibu kama ni ya kweli na yanastahili kulipwa.

 habari na THOBIAS MWANAKATWE

SOURCE: NIPASHE

on Wednesday, June 12, 2013