MSD YATOA MSAADA WA FULANA 300 KWA MADAKTARI KWA AJILI YA MKUTANO WAO WA MWAKA UTAKAOFANYIKA NOVEMBA 28-29 JIJINI DAR ES SALAAM.

Mkurugenzi wa Fedha wa Bohari ya Dawa (MSD), Joseph Tesha (wa pili kushoto), akimkabidhi msaada wa fulana Rais wa Chama cha Madaktari Tanzania (MAT), Dk.Primus Saidia Dar es Salaam juzi, kwaajili ya mkutano mkuu wa mwaka wa MAT utakaofanyika Novemba 28 na 29 katika Hospitali ya Taifa ya Muhimbili.Wengine katika picha kulia ni Meneja wa Huduma kwa Wateja na Uhusiano wa MSD, Salome Mallamia na Ofisa Misaada wa MSD, Milton Kigwinya. (PICHA NA DOTTO MWAIBALE)

………………………………………………………………………………….

Na Dotto Mwaibale

BOHARI ya Dawa (MSD), imetoa msaada wa fulana 300 zenye thamani ya sh.5.5milioni kwa Chama cha Madaktari Tanzania (MAT), kwa ajili ya mkutano mkuu wa chama hicho utakaofanyika Novemba 28 na 29 mwaka huu.

Akizungumza katika hafla ya utoaji wa msaada huo iliyofanyika juzi jijini Dar es Salaam, Mkurugenzi wa Fedha wa MSD, Joseph Tesha alisema wanajisikia fahari kushirikiana na madaktari hao kwani wao ni kitu kimoja.

“Kuwa jirani na chama hicho cha madaktari ni fursa pekee ya kupata maoni na ushauri wa kiutendaji baina ya makundi hayo mawili” alisema Tesha.

Alisema MSD inatoa huduma kwa wananchi moja kwa moja hivyo kupitia madaktari hao wanaweza kupata maoni yao ambayo yatafanyiwakazi na kusaidia maendeleo katika sekta hiyo muhimu kwa taifa la Tanzania.

Aliongeza kuwa MSD itashiriki katika maonyesho yaliyoandaliwa na MAT wakati wa siku za mkutano huo kwa kuonesha vifaa tiba vipya pamoja na kuzungumza na wadau wake wakuu wa afya ambao ni madaktari.

Katika hatua nyingine MSD inatarajia kuzindua mpango mkakati wa mwaka 2014 – 2020, ambapo pamoja na mambo mengine unazungumzia uboreshaji wa usambazaji dawa na vifaa tiba.

Kwa upande wake Rais wa Chama cha Madaktari Tanzania (MAT) Dk. Primus Saidia alisema chama  chenye wanachama wapatao 1358 kimekuwa kikilishiriana na makundi mengine katika sekta ya afya.

Alisema kwa upande wao ni fursa nyingine ya kipekee kushirikiana na MSD ili kuwaeleza yale wanayokabiliana nayo katika utendaji wao wa kila siku hasa katika masuala ya dawa na vifaa tiba.

Dk. Saidia alitumia fursa hiyo kuishukuru MSD kwa msaada huo ambao umetolewa katika kipindi muafaka cha mkutano mkuu wa chama hicho.

on Saturday, October 26, 2013