SAKATA LA WACHEZAJI WALA RUSHWA TFF YAWAANDIKIA BARUA AZAM KUPELEKA VIELELEZO

 

SHIRIKISHO la Soka Tanzania (TFF), limeiandikia barua Azam FC ili kupata vielelezo vya rushwa walizopokea wachezaji wao, Deogratius Munishi ‘Dida’ Aggrey Morris, Said Morad na Erasto Nyoni kama ilivyodai ili liweze kulifikisha suala hilo katika Kamati ya Nidhamu.

Angetile Osiah ambaye ni Katibu Mkuu wa TFF, alisema mara baada ya kupata barua ya Azam ya kuwasimamisha wachezaji wake hao wanne, waliamua kuijibu kwa kuwataka wawasilishe vielelezo vya tuhuma hizo ili wavipeleke kwenye Kamati ya Nidhamu.

“Tumewaandikia barua Azam ya kuwataka watuletee vielelezo walivyotumia kuwakamata wachezaji hao. Kwa sasa tunasubiri vielelezo hivyo ili kamati iweze kupitia na kujua nini cha kufanya kuhusiana na suala hilo kwa lengo la kuboresha soka letu,” alisema Angetile.

Wiki iliyopita Azam FC iliwasimamisha wachezaji wake wanne kutokana na tuhuma hizo za rushwa ambapo inadaiwa walipokea kabla ya mchezo dhidi ya Simba ambao uliisha kwa kikosi chao kufungwa mabao 3-1.

on Saturday, November 17, 2012