TAASISI 76 ZATAJWA KASHA ZA UNUNUZI SERIKALINI

MAMLAKA ya Udhibiti wa Ununuzi wa Umma (PPRA), imebaini kuwa taasisi 76 za Serikali zimekuwa na matumizi mabaya ya fedha kupitia utaratibu wa ununuzi wa umma katika kipindi cha mwaka 2011/12.

Miongoni mwa taasisi hizo, 22 zimebainika kukithiri kwa vitendo vya ubadhirifu vilivyoandamana na rushwa. Hizo ni pamoja na Mamlaka ya Bandari Tanzania (TPA), Chuo cha Usafirishaji cha Taifa (NIT), Wizara za Maji na Umwagiliaji na Mambo ya Ndani ya Nchi.

Akisoma ripoti ya ukaguzi wa ununuzi wa umma katika kipindi kilichoishia Juni, mwaka huu, Ofisa Mtendaji Mkuu wa PPRA, Dk Ramadhan Mlinga alisema watawasilisha majina ya wakuu wa taasisi hizo kwa Taasisi ya Kuzuia na Kupambana na Rushwa (Takukuru), kwa hatua zaidi.

“Taasisi zote ambazo zimepata asilimia 20 na zaidi katika viashiria vya rushwa zitapelekwa Takukuru kwa uchunguzi na hatua zaidi,” alisema Dk Mlinga.

Kwenye orodha hiyo ya taasisi zitakazopelekwa Takukuru, zimo pia Halmashauri za Wilaya za Kyela, Makete, Tabora, Bukombe, Sumbawanga na Jiji la Mbeya.

Alisema baada ya kukamilisha ripoti hiyo ya ukaguzi, bado PPRA itatumia wataalamu wake kuchunguza kwa undani taasisi ambazo zinakabiliwa na tuhuma.

Kuhusu taasisi nyingine ambazo pia zinakabiliwa na kashfa hiyo, alisema timu ya wataalamu wake itaendelea kufanya uchunguzi ili kujua kama chanzo chake ni uzembe, udhaifu wa kitaalamu au ni mbinu tu za kifisadi.

“Ukaguzi ulifanyika katika taasisi 121 za umma na ununuzi wote uliokaguliwa ulikuwa na thamani ya Sh2.4 trilioni... Taasisi zilizokaguliwa 41 ni wizara, idara zinazojitegemea na Wakala wa Serikali, wakati 45 ni mamlaka na mashirika ya umma na taasisi 35 za mamlaka ya Serikali za Mitaa.”

Dk Mlinga alisema waligundua ubadhirifu mwingi kwenye taasisi hizo kupitia taarifa walizopewa na watu wenye nia njema na nchi.

Pamoja na kubainika kwa ubadhirifu huo, Dk Mlinga alisema ukaguzi wa jumla unaonyesha kuwa taasisi za umma zimefanya vizuri zaidi ukilinganisha na miaka ya nyuma.

Alisema tangu mwaka 2006, taasisi hizo zimekuwa zikijirekebisha na kufanya vizuri kwenye taratibu za ununuzi. Hata hivyo, alisema kuna uzembe ambao umekuwa ukifanywa na taasisi kadhaa ambazo zimekuwa hazizingatii taratibu.

Kaimu Mwenyekiti wa Bodi ya PPRA, Jaji Thomas Mihayo alitahadharisha kuwa ununuzi wa umma ni moja ya eneo nyeti ambalo Serikali inapaswa kulichukulia kwa umakini mkubwa kwa sababu ndipo penye matumizi makubwa ya fedha.

“Asilimia 70 ya fedha zote za Serikali hutumika katika ununuzi. Umakini usipokuwepo tutajikuta fedha nyingi za walipakodi zinafujwa,” alisema Jaji Mihayo.

Kwa sababu hiyo, alisema Bodi ya PPRA inaweka mkazo katika kufumua uozo wote unaofanywa na taasisi za umma ili kukomesha tabia za ufisadi.

Habari na Leon Bahati

Chanzo - Mwananchi

on Tuesday, November 6, 2012