WAFUGAJI WAANZA KUONDOKA KATIKA MAENEO YA WAKULIMA IKWIRIRI MKOANI PWANI

 

WAFUGAJI WAKISUBIRI MALORI ILI KUWEZA KUPAKIA MIFUGO YAO KATIKA ENEO LA MIKUMI IFAKARA WAKATI WA ZOEZI LA UHAMAJI WA HIYARI KATIKA HIFADI YA BONDE LA MTO KILOMBERO WILAYA YA KILOMBERO HIVI KARIBU.MAKUNDI ya wafugaji wameanza kuondoka maeneo ya wakulima katika mji wa Ikwiriri walipokuwa wakiishi kwa muda mrefu tangu mwaka 2007, walikokaribishwa na viongozi wa vijiji na vitongoji.


Mkuu wa Wilaya ya Rufiji, Nurdin Babu alisema jana kuwa wafugaji hao walikuwa wakiishi kinyume cha sheria kwa kwamba, maeneo hayo hayakutengwa kwa ajili ya wafugaji.


Babu baada ya kuingia wilayani Rufiji, amekumbana na changamoto ya wafugaji hao ambao walitakiwa kuhama maeneo hayo na kumekuwa kukiripotiwa mapigano ya mara kwa mara kati ya wakulima na wafugaji.


Alisema wafugaji hao wametengewa maeneo ya Tawi, Mbwara, Chumbi A, B na C wameonekana wakiswaga mifugo yao kuelekea kwenda kupakia magari kwa ajili ya usafirishaji.


“Wamekuja ofisini kwangu na wameniomba kibali cha kusafirisha mifugo, nami nimekubali bila pingamizi,” alisema.
Babu alisema hata kwa wale wanaotaka kupitisha mifugo kupitia daraja la Mkapa watapata kibali kutoka ofsi yake.


Alisema maeneo ambayo hayana maji wamekubaliana na wafugaji hao kuwa waende kwanza, halafu jitihada za kutengeneza miundombinu ya maji na malambo itaendelea bila tatizo jambo la msingi ni kuhama kwanza.


Alirudia kauli yake kuwa wanaotakiwa kuhama ni wafugaji wanaoishi katika Tarafa ya Ikwiriri na kwamba, wengine waliopo katika tarafa nyingine waendelee kubaki.


Kuondoka kwa wafugaji katika eneo hilo kumeondoa pia tishio la wananchi wa Tarafa ya Ikwiriri, kufanya maandamano kushinikiza kuondoka kwa wafugaji hao.


on Tuesday, November 6, 2012