LUIS NANI KUJAZA PENGO LA THEO WALCOTT ARSENAL

 

LONDON, England

Nani, 26, kwa sasa yuko nje ya kikosi kutokana na matatizo ya nyama za paja, akiwa na salio la mkataba wa miezi 18, ambao unamuwezesha kupokea mshahara wa pauni 90,000 kwa wiki, huku akilazimisha nyongeza ya mkataba utakaompa mshahara mkubwa wa pauni 130,000, lakini Man United imekataa hilo

WASHIKA Bunduki wa jiji la London, Arsenal, wameripotiwa kuratibu zoezi la kushtua la kusaka saini ya winga hatari raia wa Ureno anayekipiga Manchester United, Luis Nani ambaye amebakisha kipindi kifupi cha mkataba wake na anaweza kuondoka Old Trafford Janurai mwakani.

Arsenal imedaiwa kujiweka sawa na dau la pauni milioni 20, ili kumtwaa Nani kama mbadala wa winga anayesuasuia kusaini nyongeza ya mkataba klabuni Emirates, Theo Walcott, ambaye naye kama Mreno huyo, amebakisha kipindi kifupi anachoapswa kukirefusha huku akidengua kufanya hivyo.

Ili kumuachia Nani, Man United inahitaji dau nono kuliko lile la pauni milioni 14 ambalo iliilipa Sporting Lisbon mwaka 2007 kupata saini ya winga huyo na bosi wa Arsenal, Arsene Wenger yu kikaangoni akishinikizwa na bodi ya klabu pamoja na mashabiki kufanya usajili wa majina makubwa kwa dau nono.

Nani, 26, kwa sasa yuko nje ya kikosi kutokana na matatizo ya nyama za paja, akiwa na salio la mkataba wa miezi 18, ambao unamuwezesha kupokea mshahara wa pauni 90,000 kwa wiki, huku akilazimisha nyongeza ya mkataba utakaompa mshahara mkubwa wa pauni 130,000, lakini Man United imekataa hilo.

Wakati Arsenal ikiwa tayari kumpa mkataba wenye mshahara wa pauni 80,000 kwa wiki kwa winga wake Walcott, wameonesha kuwa wana uwezo na utayari wa kulipa mshahara zaidi ya huo kwa wachezaji wengine. Andrey Arshavin anapokea mshahara wa pauni 90,000 kwa wiki, kama ilivyo kwa Mjerumani Lukas Podolski.

Klabu mbili zinazotumia zaidi pesa katika usajili barani Ulaya za Zenit St Petersburg ya Russia na Paris St Germain ya Ufaransa, zimetajwa kumwania Nani, Mreno anayependa kubaki katika Ligi Kuu ya England, ambako pia matajiri wa jiji la London, Chelsea wanasikilizia mchakato wake Old Trafford utaishaje.

on Wednesday, December 12, 2012