Pinda amtembelea Askofu Thomas Lazier hospitalini

 

Waziri Mkuu, Mizengo Pinda, amtembelea hospitali ya Selian, inayomilikiwa na kanisa la Kiinjili la Kilutheri Tanzania (KKKT), jijini Arusha, kumjulia hali Askofu Thomas Laizer, ambaye amelazwa kwa zaidi ya miezi miwili iliyopita.

Pinda aliingia hospitalini hapo jana saa 9 alasiri na kukaa zaidi ya nusu saa huku waandishi wa habari wakizuiwa kuingia katika chumba hicho cha wagonjwa mahututi.

Hata hivyo, baada ya kutoka katika chumba hicho, Pinda hakuzungumza na waandishi wa habari na kulikuwa na ulinzi mkali wa kuzuia waandishi wa habari kufanya naye mahojiano.

Hali ya Askofu Laizer imekuwa tete, baada ya kuwapo kwa habari zisizo na uhakika kuwa amehamishiwa katika Hospitali ya Rufaa ya KCMC, mkoani Kilimanjaro.

Hata hivyo, jana ukweli wa taarifa hizo ulibainika kuwa kiongozi huyo wa kiroho amelazwa katika Hospitali ya Selian jijini hapa, baada ya Waziri Mkuu kumtembelea.

NIPASHE lilijaribu kuzungumza na watumishi wa hopsitali hiyo, ambao hawakutaka kutajwa majina yao na kusema hali ya afya ya Askofu Laizer siyo nzuri na kwamba watu wanapaswa kumwombea.

Lakini pia hawakuwa tayari kutaja ugonjwa unaomsumbua Askofu huyo kwa kudai kuwa wao siyo wasemaji.

Kabla ya Waziri Mkuu Pinda kufika hospitalini hapo, asubuhi, alifungua mkutano wa Jumuiya ya Afrika Mashariki, unaoshughulikia masuala ya gesi na mafuta na baadaye mchana alitembelea kituo cha watoto yatima na waishio katika mazingira magumu cha SOS, kilichopo Ngaramtoni, nje kidogo ya Jiji la Arusha.

Akiwa katika kituo hicho Waziri Mkuu Pinda alitoa Shilingi milioni 20 kuwasaidia watoto hao na kuwaomba wadau wengine wenye uwezo kujitokeza kusaidia watoto

on Thursday, February 7, 2013