WAHITIMU WATAKA TAALUMA ZA WAHITIMU TEKU ZICHUNGUZWE

 

Meza kuu

Lango la kuingilia chuoni hapo

Waziri Mkuu mstaafu Edward Lowassa(M-NEC) Mbunge Jimbo la Monduli, akiwa anaingia katika kanisa la Moravian Tanzania usharika wa Ruanda Jijini Mbeya 25.11.2012. kuchangia chuo cha TEKU (Picha na maktaba ya kalulunga

Na Gordon Kalulunga, Mbeya

WAHADHILI wa chuo kikuu cha Teofilo Kisanji(TEKU) Mbeya kinachomilikiwa na kanisa la Moravian Tanzania, wameitaka serikali na mamlaka zinazosimamia vyuo vikuu nchini, kuchunguza taaluma za wahitimu wa chuo hicho.

Wakizungumza na waandishi wa habari jana, walisema kuwa wamefikia hatua hiyo baada ya kuona baadhi ya wanafunzi wanaofeli masomo na kutakiwa kurudia, wakiongezewa alama za ufaulu huku wakufunzi wasio na sifa wakizidi kuajiliwa.

Walisema kutokana na hali hiyo, hawatatunga mitihani ya mhula iliyotarajiwa kuanza Julai 1, mwaka huu kutokana na kupuuzwa na utawala wanapotoa ushauri wa kitaaluma.

Kaimu Mwenyekiti wa chama cha wahadhili wa chuo hicho (TEKUASA), Amani Simbeye, alisema wahadhili hao zaidi ya 42 walifikia hatua ya kutoa taarifa kwa umma kupitia vyombo vya habari kutokana na kupewa kauli za vitisho na matusi wanapohoji au kushauri mambo kitaaluma.

‘’Kutokana na hali hiyo hatuna imani na makamu mkuu wa chuo, maana utawala unafanya mambo yote bila kushirikisha wahadhili ikiwemo kupunguza muda wa masomo kwa wiki mbili na kusababisha walimu kushindwa kumaliza mada na tumeshushwa morali ya kazi’’ alisema Simbeye.

Aidha alisema kutokana na uongozi wa chuo kufanya mambo bila kuzingatia utawala bora na kuheshimu wahadhili, imefikia hatua wanafunzi hufaulishwa kwa kupewa alama za ufaulu katika masomo wanayofeli akiwemo mwanafunzi Mbunda Samson ambaye amefaulishwa na uongozi umeshindwa kutolea ufafanuzi jambo hilo.

Wahadhili hao walisema mbali na hayo, kuna ukosefu wa idara za masomo ikiwemo watu wa kusimamia ubora wa taaluma itolewayo na chuo,hali waliyoitaja kuwa ni uasi wa waumini wa kanisa la Moravian Tanzania wanaotoa sadaka na kuchangia harambee kukiwezesha chuo kuendelea.

‘’Tumekaa kimya kwa muda mrefu na lengo letu ni kuokoa chuo na taaluma itolewayo hapa chuoni’’ alisema Simbeye.

Makamu mkuu wa chuo hicho Prof. Tuli Kasimoto hakupatikana chuoni hapo kwa kile kilichoelezwa kuwa alikuwa nje ya mkoa wa Mbeya.

Kaimu Makamu mkuu wa chuo hicho Dr. Daniel Mosses, alipofuatwa ofisini kwake ili kuweza kujibu tuhuma hizo, alikataa kuzungumzia suala hilo kwa madai kuwa yeye siyo msemaji.

Novemba 25, 2012, Waziri Mkuu mstaafu Edward Lowassa alikuwa mgeni rasmi katika harambee ya kuchangia chuo hicho cha TEKU ambapo alitoa Shilingi Milioni 10 katika sherehe zilizofanyika katika kanisa la Moravian Tanzania usharika wa Ruanda mjini Mbeya.

Hata hivyo, uchunguzi umebaii kuwa mgogoro kati ya wahadhili hao na uongozi wa chuo hicho umedumu kwa zaidi ya mwaka mmoja ambapo imefikia hatua baadhi ya wahadhili wamekataa uteuzi wa vyeo vya juu vya chuo hicho licha ya kuahidiwa mishahara minono huku wengine saba wakidaiwa kung’atuka kwenye nafasi zao za idara.

on Tuesday, June 25, 2013