Uzinduzi wa Mashindano ya Mifugo Kitaifa, Dodoma

 

\

Naibu Waziri wa Maendeleo ya Mifugo na Uvuvi, Mhe. Benedict Nangoro akitoa hotuba wakati wa uzinduzi rasmi wa Mashindano ya Mifugo Kitaifa leo Agosti 05, 2013 katika Viwanja vya Maonesho ya Nane Nane, Nzuguni Dodoma(Picha na Lucas Mboje wa Jeshi la Magereza).

…………………..

Na Lucas Mboje wa Jeshi la Magereza, Dodoma

Naibu Waziri wa Maendeleo ya Mifugo na Uvuvi, Mhe. Benedict Nangoro amaewataka Wafugaji nchini kuondokana na ufugaji wa Mifugo unaozingatia wingi wa Mifugo kuliko kuzingatia uzalishaji.

Mhe. Naibu Waziri wa Maendeleo ya Mifugo na Uvuvi ameyasema hayo leo wakati wa Mashindano Maalum ya Mifugo Kitaifa yaliyofanyika katika Viwanja vya Maonesho ya Nane Nane, Nzuguni Dodoma ambapo Taasisi mbalimbali za Serikali, Mashirika na Wafugaji Binafsi wameshiriki Mashindano hayo.

Mhe. Nangoro amesema kuwa lengo kubwa la Mashindano hayo ya Mifugo ni kutoa fursa kwa Wafugaji hapa nchini kujifunza mbinu mpya na bora zaidi za uzalishaji na uvunaji wa mazao ya Mifugo hivyo kuleta tija katika Sekta ya Ufugaji wa Mifugo hapa nchini.

“Nawaombeni sana ndugu zangu Wakulima na Wafugaji tujifunze njia hizo mpya na bora za uzalishaji wa mazao ya Mifugo na Mwanafunzi mzuri ni yule anayeelewa na kupata maarifa zaidi na kuyatekeleza katika utendaji wake wa kila siku”. Alisisitiza Mhe. Nangoro

Aliongeza kuwa Asilimia 80 ya Watanzania hapa Nchini katika Idadi yao ni Wakulima na Wafugaji hivyo wakipatiwa Elimu ya Teknolojia na mbinu mpya za uzalishaji na uvunaji wa mazao ya Mifugo Watanzania kujikwamua Kiuchumi hivyo kupunguza umasikini hapa nchini.

Kwa upande wake Naibu Katibu Mkuu, Wizara ya Maendeleo ya Mifugo na Uvuvi, Dkt. Yohana Budeba amesema kuwa Mashindano hayo ya Mifugo Kitaifa yalizinduliwa rasmi mwaka 2011 na Waziri Mkuu wa Jamhuri ya Muungano wa Tanzania, Mhe. Mizengo Pinda kufuatia Agizo alilolitoa Mhe. Rais wa Jamhuri ya Muungano wa Tanzania, Dkt. Jakaya Mrisho Kikwete wakati wa Kilele cha Maonesho ya Nane Nane Kitaifa yaliyofanyika katika Viwanja vya Nzuguni, Dodoma mwaka 2010 ili kutoa fursa kwa Wakulima na Wafugaji kupata elimu na mbinu mpya za ufugaji wa Mifugo.

Dkt. Budeba ameahidi kuwa Wizara yake itaendelea kushirikiana na Wafugaji katika  kuboresha Sekta ya Mifugo hapa nchini kwa kuwapatia huduma muhimu za Mifugo ikiwemo upatikanaji wa pembejeo za Mifugo pamoja na kushirikiana na Wadau Wengine ili kuboresha Soko la Mazao ya Mifugo hapa nchini.

Mashindano haya ya Mifugo Kitaifa yanafanyika kwa mara ya tatu ambapo mara ya kwanza yalifanyika mwaka 2011 katika Viwanja vya Maonesho ya Nane Nane Nzuguni, Mkoani Dodoma na washiriki mbalimbali hushiriki Mashindano haya zikiwemo Taasisi za Serikali, Mashirika na Wafugaji Binafsi kwa lengo la kutoa elimu ya umma kwa Wafugaji na mbinu bora za uzalishaji na uvunaji wa mazao ya Mifugo.

on Tuesday, August 6, 2013