Wabunge: Tumechoshwa na ziara, tunataka vitendo

Naibu Waziri wa Ardhi, Nyumba na Maendeleo ya Makazi, Goodlucky Ole Medeye (katikati), akiwa na wabunge wa Tanzania wakitembelea nyumba zilizojengwa na Serikali nchini Singapore na kuuzwa wananchi.Picha na Neville Meena 

********

Singapore. Baadhi ya wabunge ambao wapo ziara ya mafunzo ya uendelezaji makazi nchini Singapore, wamesema wamechoshwa na ziara za aina hiyo, huku wakiitaka Serikali kutekeleza yale ambayo wamekuwa wakiyaona nje ya nchi.

Wabunge hao walitoa kauli hizo jana baada ya kutembelea Makao Makuu ya Mamlaka ya Uendelezaji Miji ya Singapore (Ura), ambako walielezwa jinsi mamlaka hiyo inavyosimamia sheria za mipango na uendelezaji miji.

Ziara hiyo ambayo pia inamshirikisha Naibu Waziri wa Ardhi, Nyumba na Maendeleo ya Makazi, Goodlucky Ole Medeye, kumekuwa na mjadala mkali kuhusu namna miji ya Tanzania isivyo na mpagilio, matumuzi ya ardhi yasiyo na tija na mipango isiyozingatia vipaumbele vya nchi.

Mbunge wa Magomeni (CCM), Mohammed Chomboh alisema: “Kinachoniumiza moyo ni kwamba tutakuwa si watendaji na tunabaki wasemaji na wapangaji hadi lini? Natoka Zanzibar, kiongozi wetu wa kwanza Mzee Abeid Amaan Karume aliamua tu kwamba tunataka nyumba za wananchi wetu za kisasa na tunaweza na akafanya”.

Hata hivyo, Mbunge wa Kawe, Halima Mdee (Chadema), alisema ni vigumu kwa NHC kumudu kutekeleza majukumu yake kwa manufaa ya umma kwani shirika hilo halipewi ruzuku yoyote kutoka Serikalini.

Mbunge wa Viti Maalumu, Amina Mwidau (CUF), alisema tatizo kubwa ni uongozi ambao umeshindwa kuleta mabadiliko na kwamba, demokrasia imekuwa ikitumika kama kigezo cha kulea uozo katika utendaji.

Naye Mwenyekiti wa Kamati ya Bunge ya Hesabu za Serikali, Zitto Kabwe, alisema wakati mwingine wabunge wamekuwa wakiona aibu kuendelea kujifunza kila kukicha na kwamba, lazima ifike mahali itoshe ili kuilazimisha Serikali kuingia kwenye utekelezaji.

“Jambo la msingi kwa wabunge ni kwenda kusisitiza mambo haya ndani ya Bunge,” alisema Zitto.

kama NHC wana project (mradi) yoyote ambayo inaweza ikabadili hali ya miji yetu, tuwape nguvu wafanye hata kama ni kidogokidogo, lazima tutoke kwenye hatua ya kuzungumza, kupanga na kutembelea kujifunza, ni wakati wa kutenda,”alisema Zitto.

MWANANCHI

on Monday, September 23, 2013