Mwanajeshi ahukumiwa kunyongwa hadi kufa Singida

Na Nathaniel Limu, Singida

MWANAJESHI mstaafu wa jeshi la wananchi Tanzania (JWTZ) mkazi wa kijiji cha Ighuka wilaya ya Ikungi mkoani Singida,Selemani Juma Karani (64),amehukumiwa na mahakama kuu kanda ya Dodoma adhabu ya kunyongwa hadi kufa.

Karani amehukumiwa adhabu hiyo baada ya kutiwa hatiani kwa kosa la kumpiga mshale wa sumu jirani yake Hadija Swalehe kichwani  upande wa kulia, na kutokezea sikio la kushoto na kusababisha kifo chake.

Mwendesha mashitaka wakili wa serikali mwandamizi,Seif Ahmed,amedai mbele ya msajili mkuu wa mahakama kuu kanda ya Dar-es-salaam mwenye mamlaka ya kusikiliza kesi za mauaji Huruma Shaidi,kuwa mnamo februari 10 mwaka 2009 saa tisa alasiri,mshitakiwa Karani kwa makusudi,alimpiga jirani yake mshale moja kichwani.

Mwendesha mashitaka huyo alisema kuwa mshitakiwa ametenda kosa hilo huku akijua wazi kuwa , kitendo hicho ni kinyume na sheria.

Seif alisema siku ya tukio,mshitakiwa Karani akiwa amebeba upinde na mshale moja,alienda nyumbani kwa jirani yake Hadija, na alipomkuta bila kusalimia au kuzozana,alinyanyua upinde wake na kumpiga kichwani.

Alisema kuwa Hadija aliweza kukimbilia kwa jirani yake Rehema Abdala na kumwomba amtolee mshale huo,lakini Rehema alimshauri amkimbize kituo cha afya Ikungi kwa madai yeye asingeweza kuutoa.

“Wakiwa njiani wanamkimbiza Hadija kituo cha afya Ikungi,alifariki dunia.Hata hivyo walimfikisha katika kituo hicho cha afya kwa lengo la kutolewa kwa mshale huo”,alisema mwanasheria huyo mwandamizi wa serikali.

Seif aliiambi mahakama hiyo kwamba mashahidi wote wamedai kuwa hawakuwahi kusikia ugomvi wo wote kati ya mshitakiwa na Hadija, na kwamba mauaji hayo yanahusishwa  na masuala ya ardhi na ushirikina.

Mmoja wa mshahidi katika kesi hiyo, Fatuma Alli, aliiambia mahakama hiyo kuwa siku ya tukio alikuwa  nyumbani kwa Hadija wamejipumzisha.

Akifafanua,alisema ghafla Karani aliingia na alipowakuta,hakuzungumza cho chote alinyanyua upinde wake nakumlega Hadija na kasha  kumpiga mshale moja na  kisha kuondoka kimya kimya.

Mshitakiwa Karani akijitetea kupitia kwa wakili wake wa kujitegemea kutoka Dodoma mjini,Mwigulu Simon,alikana kutenda kitendo hicho na kudai kwamba siku ya tukio,alikuwa Makiungu hospitalini akipatiwa matibabu.

Akitoa hukumu hiyo,msajili huyo,alisema ushahidi uliotolewa na upande wa mashitaka,umethibitisha bila kuacha shaka yo yote kwamba mshitakiwa ana hatia kama alivyoshitakiwa.

“Kosa la kuua kwa kukusudia,adhabu yake ni moja nayo ni kunyongwa hadi kufa kwa mujibu wa sheria  ya 196 kanuni ya adhabu sura 16.Hivyo mshitakiwa Karani mahakama hii kuu,inakuhukumu adhabu ya kuonyongwa hadi kufa”,alisema msajili huyo mkuu.

on Friday, November 13, 2015