Polisi Mwanza yazuia mikusanyiko ya maandamano ya CHADEMA

Polisi mkoa wa Mwanza imezuia mikusanyiko ya watu na maandamano kwa kuhofia kuenea kwa ugonjwa wa kipindupindu ambao unatajwa kuzagaa mkoani humo.

Hatua hiyo inatokana na kuwepo kwa taarifa za shughuli ya kuuaga mwili wa aliyekuwa mwenyekiti wa Chama cha Demokrasia na Maendeleo CHADEMA mkoa wa Geita katika viwanja vya Furahisha.

Kwa mujibu wa taarifa za kiintelijensia za jeshi la polisi, mwili wa aliyekuwa Mwenyekiti wa CHADEMA mkoa wa Geita Alphonce Mawazo unatarajiwa kuagwa kesho katika viwanja vya Furahisha jijini Mwanza.

Licha ya marufuku hiyo, Jeshi la polisi limeahidi kushirikiana na waombolezaji kuhakikisha mwili huo unafikishwa kwa amani mkoani Geita

Katika hatua nyingine, Kamanda Mkumbo amesema tarehe 16 mwezi huu kuliripotiwa mvua kubwa wilayani Kwimba ambayo ilisababisha kifo cha mzee wa miaka 80,  na nyumba 300 kuharibiwa na mvua.

Kaimu mganga mkuu wa Mkoa wa Mwanza Onesmo Ruwakendwa amewataka wananchi kutii amri ya kutokukusanyika na kufanya maandamano ili kuepusha maambukizi mapya ya ugonjwa wa kipindupindu.

Mkoani  Mwanza Ugonjwa wa kipindupindu uliripotiwa kuanza miezi miwili iliyopita na hadi sasa wagonjwa 420 wamelazwa na 28 tayari wamepoteza maisha.

on Saturday, November 21, 2015